Thmu ka KHADC ban shna sa kawei ka Ïewduh sha Mawroh, ong ka EM

Shillong:”Namar ba ka Ïewduh ka la khapngiah palat, kumta na ka liang ka KHADC ha ryngkat lang ka jingïatreilang bad ka ophis u Syiem Hima Mylliem, ka la shim ka rai ban pynheh ïa ka Ïewduh mynta la thmu ban shna sa kawei ka Ïewduh sha Mawroh ka jaka jong u Syiem ka Dorbar bad kane ka jingthmu ka long ruh namar kumba 75% kiba shong ïew dei ki long kmie,” ong ka Kong Grace Mary Kharpuri, EM incharge Market ha KHADC.

Ïa katei ka la ïathuh ha ka prokram hapoh Ïewduh ha ka sngi ba-ar, da kaba ong ba ka jingtei thymmai ka Ïewdielang kan long ha ka mala nyng kong kin shong kiba dielang bad kaba ar kiba die khutia bad la buh hapoh 6 ban pyndep tei ïa ka Ïewdielang.
Ka la ong ruh ba nalor ba la ibit bad idei ban tei noh ïa ka Ïewdielang kaba kham pynheh la donkam ruh ban tei sa kawei ka ïew ba kham heh sha Mawroh.

“Nga khmih lynti ban nang lah ban leh khambha shuh shuh ïa ka Ïewduh bad nga kyrpad ïa kiba shong ïew ban sumar bad peit ïa ka kum la ka jong ka pliangja. Ngi kwah ba ka Ïewduh kan long ka tourist spot, kumta kan dei ban long kaba khuid bad ymdei ban pynjulor ïa ki CCTV ne PA system,” ka la ong.
Katba u EM ka Elaka u Bah Jambor War u la pynkynmaw ba ha u snem 1919 ki dohlieh ki la pan na ka Hima ban pynbha katkum ka juk ïa ka Ïewduh, hynrei ka Dorbar kyntang ka hima ka khlem shah.

“Mynshwa ka Ïewduh ka dei ka nongbsa tang ïa ki trai ri trai muluk, hynrei mynta ka la kylla long ruh ka pliangja jong kiwei kiba nabar jylla kiba im ja napoh Ïewduh. Ka dei ruh kaba pawnam ym tang ha thaiñ shatei lammihngi, hynrei ka la paw ruh sha ka pyrthei lyngba ka jingpyllait ïa ka phlim Ïewduh. Ka Ïewduh kadei kaba heh duh, kaba rim bad kaba kyntang,” ong u Bah War.

U la ïathuh ba ha u snem 2019, mynba u dang bat ïa ka tnat Market ka EC ka la mang T. 20 lak ban buh ïa ki Solar light ha Ïewduh. Ha u juh u snem la pynsngewthuh halor ka jingpynduh pyndonkam plastik da ka jingthmu ban pynsah ka riti longshwa manshwa bad kum u EM ha katei ka por la sngewdei ruh ban pynkhlaiñ ïa ka Hima Mylliem da ka jingthmu ban wanrah noh da u Syiem ban synshar pura.