Shillong:Haba la poi ka aiom ba ki nongrep synsar kin ioh ban kheit ia u Synsar u ba ki thung ha ki jaka rep, ka ju mih ka jingud jingnam na ki nongrep halor ka jinghiar dor palat u Synsar ha ki iew ki hat. Kane ka ju jia man u snem, kumta ka sorkar ha u snem ba la dep ka la thaw ia ka Meghalaya State Agricultural Marketing Board kaba mang Pisa na ka bynta ban thied ia u synsar na ki nongrep ha ka dor kaba biang.
Ha ka jingioh ban leit ia kynduh ia ki nongrep na ka thaiñ Iewrynghep bad Mawpynthymai kaba hap hapoh ka Mawkynrew C&RD Block, ki la pynpaw ia ka jingsngewkmen halor ka sienjam ba ka sorkar ka shim ban kyntiew ia ki nongrep synsar.
Ha ka juh ka por, ki nongrep ki la buh ruh ka jingkyrpad sha ka Sorkar Jylla ba kan dang kham pynkiew ia ka dor u Synsar ba ka thied namar ka jingkiewdor ki marbam mardih ha ka Jylla. Haba kren bad ki nongrep synsar kiba ioh ban die ia u Synsar sha ki Society ki ba la bei Pisa da ka sorkar, ki la iathuh ba u Synsar hi u dei u jingthung u ba hap ban ri ban sumar bah namar lada u la ioh ka slap u la duh noh tang shu saw khynnait u la hap noh ka dor, kumta ka wanrah jingeh bha ia ki nongrep synsar.
“Hynrei lyngba ka jingiarap ka sorkar ka don ka jingmyntoi ia ki nongrep, namar ba ki Society kaba pyniaid haba ka thied ia u Synsar na ki nongrep kam ju ot dor shuh lada u Synsar u long kumno kumno ruh” la ong u nongrep.
Ki la bynrap”Lada ia nujor ia ka jingthied synsar ki nongkhaii hi ka long ba ki thied 15-20 tyngka u Synsar u ba la 2-3 number hynrei ka society ka shim kyllum ha ka juh ka dor.Haba kren halor ka jingeh ban pyniaid iew ka long ba ka dor u Synsar ka la hiar shabar palat bad halor sa ka jingshah ot kilo man ka por, kaba pynduh nong ia ki nongrep”.
Kawei ka longkmie kaba ju rep Synsar naduh ba ka dang khynnah ka la ong “Nga dei ka nongrep synsar kaba naduh nga dang khynnah bad u dei u marrep u ba ju kyrshan ia ka jingim, ha kaba ngi ioh ban buh skul ban pynnang pynstad ia ki, hynrei ka jinghiar dor u Synsar pat ha ki snem ba la leitnoh ka pynsngewsih ia ngi kum ki nongrep synsar”.
Ka la bynrap”Hynrei ha u snem ba la dep la thaw ia ka Mawpynthymai Multipurpose Society ba kin thied ia u Synsar na ki nongrep kane ka thaiñ.Ka dor kane ka society ka thief ka long 55 tyngka shikilo khlem da ot kilo, ki shim kyllum, katba da ianujor ha ka dor iew ka pher bak ly bak, kaba long ka jingkyrshan ia ki nongrep synsar. Ka la ong ruh “Namar ba ka jingkiewdor ha kali marbam mardih, ngi buh ka jingkyrpad ia ka Sorkar ba kan dang kham kyntiew ia ka dor jong u Synsar.Ngi kwah ba ka Sorkar kan buh ia ka dor u Synsar sha ka 150 lane 200 shikilo lada ka sorkar kan lah ban iarap ha kane ka rukom kan long ka jingmyntoi sha ki nongrep”.
“Ka jingthep ia u Synsar hi kam dei kaba suk ka dei kaba jynjar namar u dei u jingthung ba mih sha ki riat ki ram, haba ki nongkhaii ki thief ia u Synsar ki thied tang ha ka dor 40 -45 shi kilo, hynrei na ka liang ka Society ki thied 55 hynrei ka jingkyrpad hi ka long ban pynkiew shuh ia ka dor khang ba kan iarap ia ki nongrep” la ong uwei u nongrep.
Phi don ban ong eiei?