Thiah u rangbah ha parking lot, bym don pisa ban leit shnong

Shillong:Ym tang ba ka pyrthei ka long kaba rem ha ki liang baroh hynrei naduh ba la wan lynshop ka khlam Covid-19 katno ka la ktah bha ia ka ioh ka kot jong ki paidbah ka jylla khamtam lei lei kiba shu im kyndoi jakpoh da ka kam kaba duna ka jingioh, kiba shu im ban kamai mynsngi bad bam mynmiet.

Haba phai sha ki nongrep bad ki nongdie biskot katno ka iew ka jong ki ka hiar bha ha kine ki sngi bad ha kaka ki nongkyndong kiba rep ia u biskot bad kiba wanrah ia u biskot ban die sha Iew kaba don ha Shillong ki la mad ia ka jingeh shikat dei eh namar ba kim shym la don satia ki nongwan thied ia kitei ki biskot ba ki die bad kitei ki biskot ki lah shu sahkut da ki hajar borni.

Haba kren halor kane ka bynta, u President ka Hill Farmer Union, u Bah Commander Shangpliang u la iathuh ba ka jingsohsat ki nongrep na ki thaiñ West kiba die ia ki mar rep ha Iew Anjalee ka la long kaba haduh katta katta bad ki la ia phone ruh ia u ban iathuh ia ki jingeh namar ka jingtad dor eh jong u biskot kaba long 5 tyngka kaba rem duh bad kumjuh ruh ki la iathuh ia u ia ka jingsahkut jong ki mar rep da ki borni haduh ba hap pynphai noh sha la ki jaka ba ki wan poi. U Bah Commander u la iathuh ba hadien ba u la iakren bad ki nongkhaii kiba ju thep supplai napoh Anjalee ki la ong ba ka jinghiardor jong une u biskot ka dei namar ba shatei sha Assam ruh ka duna bha ka jingkwah ia kine ki biskot bad kawei ruh ka la long ba ha kine ki ar sngi ruh ka la don ka korphiw bad une u mar rep u lah shu sahkut kumto khlem lah satia ban pyniaid iew kaba pynlong ia une u mar rep ba un bun bad haba u bun ka dor pat ka hiar. U Bah Commander Shangpliang u la kyrpad bad pynsngew ha ka Sorkar ba ka dei ban pyllait noh ia kane ka korphiw khnang ba kan iaid beit iaid ryntih noh ka jingdie jingthied.

Shuh shuh u la don ruh uwei u Rangbah na ki shnong Jakrem u ba rep ia u biskot u la iathuh ba haduh 20 borni u biskot u la wanrah sha Iew Shillong hynrei la arsngi mynta u khlem shym la lah die satia wat tang shi kilo ruh. U la iathuh ruh da kaba sngew myllung bha ba u hap ban thiah ha parking lot bad ap ia u biskot ba sahkut namar lada u mut ban pynphai sha shnong ruh um don bai kalai satia namar ba u khlem lah die tang khyndiat ruh.