Ther u slap ba jur tam ha Shillong, haduh 78.6 mm

Shillong, 20 Jylliew:
Ki 24 kynta ba ladep, ki dei ki kynta ba jur slap tam ha ka nongbah Shillong, na ka bynta u snem 2013, ha kaba ka jingjur slap, ka la poi sha ka 78.6milimetre.
Na ka jingkhein jong ka tnat peit mariang, ka Meteorological Department jong ka sorkar India, kaba don ha Upper Shillong, la iathuh ba ka jingjur slap, ha kine ki 24 kynta, ka dei ka bym pat ju jia satia ha kane ka snem, ha kaba la shim ruh, ba ka dei ka snem, kaba kham duna slap, ban ia kiwei pat ki snem, haduh kane ka shiteng snem.
Wat la ki 24 kynta ba ladep, ki dei makna ki kynta kiba jur slap bha, hynrei ka jingshit jingkhriat, ha ka nongbah Shillong, kam shym la hiar satia bad la sngewthuh ba ka mariang, ka don ha ka jingshit lhop bad na ka jingkhein, kaba la ai da katei ka tnat, la pyni, ba ka jingshit ka poi sha ka 24.8 degree, katba ka jingkhriat, ka poi tang haduh 17.6 degree.
Ha Sohra ruh ha kine ki 24 kynta ba ladep, ka jingshit ka poi sha ka 26.2 kaba shit eh bad kaba khriat eh, ka long 18.4 bad la iohi ba ka Umiam, ka jingshit ka poi haduh 30.2, katba ka jingkhriat ka long tang haduh 20.0 degree.