Ther U Phria ha Jaintia Hills & Nongkulang

Jowai, 29 Iaiong:
U Phria ha ryngkat u lapbah u la ther tyngeh ha ki katto katne ki bynta jong ka East bad West Jaintia Hills haduh ba palat 200 tylli ki iing-tin ki la shah pynjot ha kane ka miet sngi Palei.
Mynta ka sngi, ki BDOs ki la hiar sha ki shnong kiba la shah ktah ban jurip ia ki iing kiba la shah pynjot ha u Phria.
U BDO ka Khlieh riat u la hiar sha ka shnong Nongsning ha ryngkat u Gramsevak. “Hooid u BDO u la wan ban jngoh ia ka shnong jong ngi”, la ong u ma Kupbor Siang shai uba dei u Rangbah shnong katei ka shnong.
U ma Siangshai u la ong ba ka jingjulor ha ka shnong jong u ka la kot haduh palat shi spah iing. “Ngi don haduh 125 tylli ki longing bad ki iing dewbilat ki don tang haduh 20 tylli bad baroh kidei ki iing tin suda. Kine ki iing tin ki la pei lut namar u Phria u long uba heh kat ka pela sha bad bad khamheh ruh”, la ong u ma Kupbor.
Ha West Jaintia Hills, ha ka juh ka miet hynrei dang ha ka por 9 baje u Lapbah bad u Phria u la ther ia ka shnong Padu bad kiwei kiwei ki shnong ba marjan.
U BDO ka Amlarem u la hiar mynta ka sngi sha katei ka jaka bad la iathuh ba ki don haduh kumba palat 100 tylli ki iing ki la shah pynjulor.
Kawei pat ka khubor, ka iathuh ba ka eriong kaba la wan khyllep ha ka miet 28 tarik mynta u bnai ha ki thain kulang kala pynjot ia ki 32 tylli ki long iing bad ha kane ka jingjia 12 ngut ki briew kila mynsaw la iathuh u Bah R K  Hahshah u wei na ki nongkit kam shnong.
Haba kren ha u SP News Agency u la iathuh ba kane ka jingwan kyrthep kane ka eriong kala jia ha ka por shiteng miet ha ka por ba ki briew kila thaih. Ha kane ka jingjia ki long iing kiba la shah ktah ki long 32 tylli bad ki briew kiba la mynsaw tang kiba la ioh jingkhien ki long 12 ngut la ong ba lah ban tam na kane ruh.
La iathuh ba kane ka shnong Nongkulang kaba don hapoh jong ka South West Khasi Hills kala mad ia kane ka jingshah pynjulor ha ka mariang ar sien ha une u bnai ha kaba sdang une u bnai iaiong la shah pynjulor ha u phria kaba ki iing kiba sop da ki tin kila bun kiba peit bad mynta ha kane ka jingshah lynshop ha ka eriong.
La iathuh ba ia kane ka jingshah lynshop ha ka mariang la pyntip sha ki bor jong ka District sha Mawkyrwat ba kin ioh ban iarap ia ki paidbah kiba la shah ktah ha kane ka jingshah pynjulor ha ka mariang. (SP News)