Ther U CEM barim, ba phah ia VAB ba tlot ki bniat

Shillong, 31 Jymmang:
U Chief Executive Member (CEM) ba rim jongka Khasi Hills Autonomous District Council (KHADC) u bah Adel bert Nongrum u la ther ia ka Executive Committee ka PDF ka KHADC kaba la pynkylla ia ki kyndon jong ka Village Administration Bill (VAB) da kaba weng ia ki kyndon ba khlain bad thep da kiba tlot.
Ka dorbar kypang ka KHADC hynnin ka sngi Saitjain ka la pdiang ia ka VAB hadien ba la weng ia ki kyndon ba la buh mynshwa  namar ka jingbthah ka sorkar jylla.
 U bah Nongrum uba la dang bteng ia ka jingshah thngan halor kane, u la  ong ba ka PDF ka la shet kylla ia ka ri bad ka jaidbynriew namar ka la rai ban pdiang ia ka VAB ba la pynkylla thymmai ym ia kaba rim ba la phah da ka KHADC sha ka sorkar.
U Bah Nongrum u la ong ba ka KHADC ka dei ban phah pdiang ia ka sorkar ia ka VAB kaba rim khlem pynkylla ia ki kyndon jongka kaba la bsuh ia ki kyndon iada ia ka jingwan tuid ki mynder bad ban iada ia ki trai ri trai muluk.
“Nga pyrkhat ba u Myntri ka tnad DCA u khot jingialang ia ki CEM ba kin rai beit halor ka VAB kaba rim hynrei kam shym la jia long kumta”, la ong u Bah Nongrum. U la ther ba ka PDF ka pyrshang ban thom da ka bor namar ba ki don bun paid hapoh ka KHADC.  ” Ki lah ban bun paid hapoh ka Iing Dorbar hynrei ka long kaba sngewsih pat ki la kylla long rit paid shabar jongka Iing Dorbar” u la ong.
U la ong ba ki Rangbah Shnong bad ki paidbah kim dei ban shu kmen tangba la pdiang bad mynjur ia ka bill hynrei dei ban shim rai hadien ba la ioh ban bishar bniah ia ka.
Hynnin ka janmiet, ki nongwan synran ia u Bah Nongrum ha ka jaka shah thngan ki la hap ban rah noh ia u sha jaka ai jingsumar ha ka por 11baje ei ei hynne ka miet namar ba hiar ka BP.
Hynrei u la pynpaw un bteng beit ia ka jingshah thngan bad un leit ban hiar biang sha ka jaka ba pynlong ia ka jaka shah thngan.