Sohra: U MLA/MDC barim ka Sohra konstitwensi u bah Titossarwell Chyne u la ther tyngeh ia u MDC ba mynta ka Sohra u bah Donevan Kharwanlang bad u la ong ba utei u MDC ka Sohra u la kam trai lut ia ki kam pynroi, kiba la poi ha Sohra bad ba kita ki kam kiba u la kam ruh kim dei satia ki kam kiba hap hapoh ka jingpeit jong u MDC.
U bah Titos u la ong ba u MDC ka Sohra u la kam ba u la pynhap 30 tylli ki shnong hapoh ka Border Area bad ia kane u la ong ka dei ka kam kaba hap hapoh ka jingpeit ka sorkar jylla bad u la ong ba dei hapoh ka jinglong MLA jong u ba u la ia said hapoh ka Assembly ba la pynhap ia ki 30 tylli ki shnong hapoh Border Area.
Nangta u bah Titos u la ong ba u MDC ka Sohra u la kam ruh ba u la wanrah ia ki kam pynroi hapoh ka Sohra Colllege, halor kane u bah Titos u la ong ba dei u Dr.Donkupar Roy uba la pynlong ia ka Sohra collge kum ka Kolej sorkar bad hadien ba iohi ia ki jingbym biang katei ka kolej ki la trei shitom ruh kumno ban pynbha ia ka bad ban wanrah ia ki kam pynroi katkum ka bor jong u MLA hynrei kim dei satia hapoh ka jingpeit jong u MDC.
Halor ka jingkam jong u MDC ba u la siang rong ia ka surok sha Laitlyndop kaba u la ong ba dei ka jingiarap u MP u bah Vincent H Pala bad u bah Kennedy , u bah Titos u la ong ba ba kane ka dei ka jingjler bad ka jingthok bad u la ong ba lada u MDC u lah ban leh kumtei balei um leh lut ia ka surok baroh ha Sohra. Kawei pat ka jingkam jong u MDC Sohra ka dei halor ka jingpynkhie im biang ia ka MCCL.
“Mynta ngan phah tohkit mynno ka District Council ka la pyllait pisa T.87 klur tyngka ia ka MCCL, ka dei ka kam kaba nga bad u Dr.Don ngi la ia ksaid bha, ngi lah ia kren ruh hapoh Assembly hynrei une u MDC u la shu jler bad shu thok im im peit peit” ong u bah Titos haba pynpaw ba ka jingthang jong u lada wan ha ka bor kum u MDC ka long ban pynkhie im biang ia ka VAB bad kiwei pat ki ishu na ka bynta ka ri bad ka jaitbynriew. Utei u MLA.MDC barim ka Sohra u la takraiñ ruh ia u MDC ba mynta ka Sohra halor ka jinglong jingman jong ka Hima Sohra , “Ka dei ka kamram jong u MDC ban pynbeit ia ki kam kiba jia hapoh ka Hima , ki kam ia knieh Sordar, ka Majai bad kiwei” ong u bah Titos.
Katba u MDC ka Shella pat u bah Teinwell Dkhar u la ong ba nadhu ba u shimti ia kam Chairman u la lap ba ki don haduh kumhba 30 tylli ki Bill jong ka District Council kiba la sahteng hapoh u Lat bad kumjuh ka sorkar jylla bad u la ong ba lada un shah jied biang un ialeh kumno ban pynlong aiñ noh ia kitei ki Bill bad u la ong ba ka daw bym lah ban Pass ia kine ki Bill ka dei namar ka jingbunkam palat ki MDC ha KHADC ha kiwei pat ki kam.