Ther U bah Ardent ia ka Congress, ha ka jingialang Smit

Shillong, 21 Naitung:
U bah Ardent M Basaiawmoit u la ther tyngeh ia ka seng Congress kaba bat ia ka bor synshar ha kane ka jylla, kaba u la kynnoh ba katei ka seng kam lah ban pyniaid beit iaid ryntih ia ka synshar khadar bad kam lah ban pynpoi ia ka roi ka par sha u paidbah ka jylla.
Haba kren ha katei ka jingialang, u bah Ardent u la ong ba dang khyndiat sngi ki heh Congress na Delhi kynthup u MP ka Shillong u ma Vincent Pala ki la wan ban pynlong jingialang ha Nongkrem bad ha katei ka jingialang ki la kren bun kiei kiei ban pynpaw ba ki kwah ban wanrah ia ka roi ka par kaba biang ha katei ka thain. U la ong ba katei ka seng ka la kdew ba naduh ki umbah umdih ha katei ka thain kaba ki la kular ban wan pynbiang, hynrei u la ong pat ba ha Nongkrem ka umbam ka don tang ha phyllaw iing katba ha Jaintia Hills pat ka shnong u MP u ma Pala ka dei ka thain kaba kordit um tam ha ka jylla, bad haduh mynta u MP um pat lah ban leh eiei ban pynbiang um ia ka Jaintia Hills, hynrei u wan ban kular pat ha Nongkrem.
U la ong ruh ba ki ju don ki jingong ba u thlen u don ha tang ha ri Khasi bad ha Jaintia um don, hynrei kiba wan ban phah thang thlen ha ki Syiem ha Smit pat kiba bun eh ki briew ki Pnar kiba wan na ka thain Jaintia, naba ki sieb ki at ka dur ka dar bad ki kynnoh ba dei u thlen hynrei ha ka jingshisha u ong ka dei ka jingjakhlia ka umbam umdih kaba la pynlong ia ki dur ki dar jong ki ban sieb ban at, ong u bah Ardent haba ther tyngeh ia u Ma Vincent Pala, MP ka Congress.