Ther tyngeh u slap ha Sohra, hynnin ka sngi

Shillong: Hynnin ka sngi, ka jinghap slap ha Sohra, ka la jubor bha, ha kaba ka la poi sha ka 555.14mm.

Ha katei kajuh ka por, ka jinghap slap ha ka nongbah Shillong, ka long 120.1mm bad ha Umiam pat ka long 62.4mm.

Mynta ka sngi, ha ka jingkhein, kaba sdang naduh ka por 8.30 mynstep haduh 5.30 janmiet, ka Sohra, ka ioh slap 133.0mm, katba ka Shillong, ka ioh 35.2mm bad ka Umiam, ka ioh 14.2mm.

Ka tnat peit mariang, ka iathuh ba lashai kan don ka jingmeh leilieh bad tied pyrthat lem bad ka jinghap slap, kaba jur bha ha ki bynta jong ka Jylla.