Ther tyngeh U Bah Paul Lyngdoh ba shah kynnoh ba jah palat 100 tylli ki file na Khasi Hills Autonomous District Council

Shillong: Lyngba ka social media facebook u Bah Paul Lyngdoh u lah kdew shai ba ki file kim shah shano shano ruh, hynrei ka dei ka jing stad jong u ban buh bha namar u lah dep peit sani bha ba u Latiplang Kharkongor u mut ban pynkhyllem ia ka EC.

U Bah Paul Lyngdoh u lah ther ruh ia u chairman ka KHADC u Pynshngain N Syiem ba u lah don lang bad u CEM hapoh kamra jong u CEM ban pynshai halor ki files ba jah na District ha khmat ki press.

U Bah Paul u lah ong ruh ba ka dei ka sien ba nyngkong ha poh ka District Council ba ka Trade Department ka lah pyn donkam da ‘File Movement Registration’ khnang ban bud dien ia ki file baroh khnang ba ki file kin nym sakma kumba shait jia ha ki por mynshwa. U lah ong ruh ba ma u hi u ba sdang nyngkong eh ban pyn donkam da ka ‘computerisation’ ia ka trade Department khnang ba ka kam kan iaid beit iaid ryntih ha ka por ka ba biang.

U Bah Paul Lyngdoh u lah buh jing kylli ba balei ka EC thymmai mynta ka khuslai palat ia kita ki files ki ba kim shym lah lap haba lah dep buh bha ia ki. “Ka jing kylli ka ban mih ha ki mynta ka long kan jia aiu ia ki nong die madan ba die ha ki jaka iaid paitbah haba ka ka jing buh por ia ki nong die madan ban wan pynrung kyrteng da ka EC barim ka lah kut?” u lah thoh.