Shillong, 13 Nailur:
Mynta ka sngi, ki dkhot jong ka Press Council of India (PCI), ki la pynlong ia ka jingialang ha Shillong bad ki nongthoh kotkhubor, na ka bynta ban sngewthuh ia ki jingeh, ba ki nongthoh kotkhubor ha ka Jylla, ki iakynduh.
Ha ka jingialang, kaba la lam khmat da U Kasuri Amarnath, uba na Andhra Pradesh, ubadei U Convener jong katei ka komiti, u iathuh ba ka jingwan jong katei ka kynhun sha Shillong, ka long na ka bynta ban sngewthuh halor ka jingshngain jong ki nongthoh khubor ha ka Jylla bad ia kaei kaba ki tnat sorkar bad kumjuh ki riew sain pyrthei ruh, ki shim ia ka jingtreikam ki nongthoh khubor ha ka Jylla ha kine ki sngi.
Ha ka jingkren jong U Bah RM Shabong, President Meghalaya Editors & Publishers Association, ula pynsngew ba kaba donkam eh, ka long ba ia ka tnat pynphriang khubor ka sorkar Jylla (information & public relations), dei ban pynkhlain noh, namar ba u ong, ba ki don ki tnat sorkar, kiba pynlong ia katei ka ophis, tang kum ka iing ai dak, ha kaba la shu bthah, tangba kan sam tang ia ki khubor bad kam don bor ban rai ia kino kino ki rai kiba kongsan, ha ka jingiadei bad ki kotkhubor. Utei u rangbah, ula kren diaw mynsiem halor ka jingleh bym salia jong ka sorkar Jylla, ia ki kotkhubor trai Jylla, ha kaba tang ia ka dor jingpynbna sorkar, la ai dor thymmai, hadien 17snem bad kata ruh ka mih, hadien ba ka MEPA, ka la kyntait ban iashim bynta ha ka sngi rakhe ia baroh ki nongthoh kotkhubor, kaba long ha u snem ba ladep. Ym tang katta, la iathuh shuh shuh, ba ia ki bill, la siew sha ki kotkhubor, hadien 3,4 snem, kaba kloi eh. La kren ruh halor ka jingshim kabu jong ki katto katne ki briew, ha kaba iadei bad ka jingmih khubor, ha kaba kim ju ai jingpynshai, halor kano kano ka khubor, hynrei, ki ju leit sha kashari ban ai mukotduma ia ki kotkhubor bapher.
U bah GB Lyngdoh General Secretery MEPA, u kren diaw mynsiem, ba wat haba ka ophis jong ka kotkhubor jongu ha Nongsain Hima, la kawang petrol bom, hynrei haduh mynta, ym shym la lap sabut satia iano iano uba leh ia katei ka kam bad katei ka dei kawei ka jingeh, kaba jia halor ka jingshah thombor jong ki kotkhubor. Nangta, ula kynthoh shuh shuh halor ka jingshah thab jong u nongshondur ha U MLA, kaba dei sa kawei pat ka daw, kaba pyni ia ka jingshah thombor ki nongthoh khubor. La bynniaw da utei u rangbah, ba ki tnat sorkar, kim ju ai satia ia ki jingpynbna sha ki kotkhubor, ha kaba kim ju pyntreikam ia ka mang jong ka sorkar India, kaba la tip kum ka Information, Education & Communication (IEC).
Ha katei ka por, u lamphang jong ka jingialang, ula knieh ktien, da kaba ong “Ka jingai jingpynbna sha ki kotkhubor, kam dei ka jingai sngewlem jong ka sorkar sha ki kotkhubor. Ka dei ka hok jong ki kotkhubor”. La kren ruh hangtei ba na ka bynta ban ioh pisa ia kitei ki jingpynbna, ka shimpor da ki bun snem bad kata ruh ban da hap leit khroh sha kitei ki tnat sorkar bapher.
U bah DL Siangshai President Journalists Union of Meghalaya (JUM), ula kren bynniaw halor ka jingma kaba ki nongthoh khubor, ki iakynduh ha kine ki sngi ha Garo Hills, ha kaba ki kaikhlaw, ki khlain jubor ha kitei ki thain. Utei u rangbah, uba dei ruh U Editor Mawphor, u iathuh ba ha ki snem 2000, ula shah kawang petrol bom ka kali jongu bad nangta ha kawei ka sien, kawei pat ka kali, ka la shah bom pynpra, tang namar, ba u thoh khubor, kaba ki don ki seng ki bym sngewtynnad.
Na ka liang jong U Deepak Singh Joint Editor Meghalaya Times, u pynsngew ba lada ki kotkhubor, ki thoh pyrshah ia kano kano ka seng, ka ju khang ban die ia ka kotkhubor ha kano kano ka jaka, kaba ki khlain ma ki bad don ruh ki khep, ba ki byrngem ban thang ia ki kotkhubor.
U bah Billy Domes Editor Dongmusa, ula kynnoh ba ki kompeni die jingiewbih bapher, ki ioh kamai bun tam na Meghalaya, hynrei, u kren lyngngoh, ba kitei kim ju mih shakhmat ban ai jingpynbna ia ki kotkhubor kiba mih na kane ka jylla. Ha kajuh ka por, U bah Domes, u kynthah ruh, halor ka jing pyniasuk, ia uba shah shoh ha U MLA, ha kamra jong u myntri rangbah ka Jylla, ha kaba na ka liang U MLA, u ialam da ka kynhun kaba heh, katba uba shah shoh, u don tang khyndiat ngut eh bad u ong shuh shuh, ba ka jingiasuk, ka long kaba donkam, hynrei, kam mut pat ban ong, ba kan iaid ha katei ka dur.
Ha kawei pat ka khubor, la iathuh ba 6 ngut ki dkhot ka Press Council of India ki la ia kynduh ia ka Myntri kam pohing ka jylla ka kong Roshan Warjri bad u Myntri ka Information and Public Relation ka jylla u Bah AL Hek. Ha katei ka jingiakynduh kaba la lam khmat da u Mr Kasori Amarnath, la pynlong ban ia kren halor ki mat ka jingiada bad ka jingshngain jong ki nongthohkhubor.
Kham hadien kane ka komiti ka la pynlong ia ka jingiaphylliew jingmut bad ka Commisisoner & Secretary , IPR, Mrs M H K Marak, Secretary , Home (Police), Bah F Kharlyngdoh, Addl DGP, Mr S K Jain and Director IPR, Bah H M Shangpliang ha Secretariat ban shim khia ia katei ki jingeh kaba la pynpaw da ki nongthohkhubor.
Ka Marak ka la kular ba kan leh ia kaba donkam ban peit ba ki nongthohkhubor kin ym ia kynduh jingeh ha ka jingtreikam jong ki. Ha katei ka jingialang ki la bun ki jngiatai bad ki jingpaphylliew jingut naka bynta kumno ban ym wanrah jingeh ia ki nongthohkhubor.
Phi don ban ong eiei?