Ther tyngeh ka FKJGP ba khein sting ka Sorkar, haba ioh pang Covid-19 ki nongtrei ka koit ka khiah

Shillong: U Bah Welbirth Rani, President ba rangbah ka Federationof Khasi Jaintia & Garo People (FKJGP), ka la ther tyngeh ia ka Sorkar Meghalaya Democratic Alliance (MDA) halor ka jingkyntait ban shim jingkitkhlieh ha kaban kit ban bah lem ia ka jingeh jong ki Frontline Workers ba ioh pang Covid-19.

Ka FKJGP ka la kynnoh ia kane halor ka jingioh khubor ba ki Frontline Worker ba ioh jingpang Covid-19, mynta kiba don ha ki Hospital bad ba shong set slung ha ka Corona Care Centre, Umsawli, ki la hap ban tip hi nadong shadong ia ki jingdonkam kynthup naduh ka bam ka dih bad hap siew wat ia ka bai thiah pang ne bai dawai.

“Ym kumba long ha u snem 2020, mynta ka kynti, ka Sorkar kam shym la pynkhreh jaka sah ba kyrpang ia ki Frontliner ban set slung ialade, hadien ki dei kiba iakynduh nongpang Covid-19. Hato kane kam buh jingma ia ki bahaiing hasem baroh” buh dak jingkylli u President ka FKJGP Bah Wellbirth Rani.

Une u Nongialam ka FKJGP ula ong ba kane ka jingleh jong ka Sorkar ka dei ka bym shonghok satia bad ka dei ka jingibeiñ ia ka jingsha kri jong kine ki Nongtrei ba hakhmat eh ban iakhun ia ka jingsaphriang ka khlam.

Ula ong “Phi pyndonkam ia ki Frontline Worker kum ki shipai ban tur hakhmat duh hynrei ynda ki iohpang pat phi kyntait ban shim ia ka jingkitkhlieh…kane ka shonghok mo?”.

Une u Nongialam ka FKJGP ula ong “Lada kine ki Frontliner ki hap ban pynlut nala ka jong ka pla ban sumar ialade na ka jingpang ne pynbiang iaki jingdonkam lajong ha ki jaka set slung, hadien ba ki koit pat, hato ka Sorkar kan phah tur biang ia ki hakhmat hakhmat ne kumno?”.

“Shu ai nuksa, ki Nongtrei ka EMRI 108 ki kit nongpang Covid-19 manla ka sngi ne iakynduh nongpang manla ka sngi hynrei hadien ba dep ka kam ki hap ban leit phai sha la iing..Kane kam buh jingma mo ia ki bahaiing hasem?. Hato ka dei kane kata ka sienjam ba shim da ka Sorkar ban tehlakam ia ka jingsaphriang jong ka khlam?”.

Halor kine kiei kiei, une u Nongialam ka FKJGP ula dawa ia ka Sorkar ba ka dei ban shim ia ka jingkitkhlieh ha kaban pynbiang noh nadong shadong ia ka jingdonkam jong ki Frontline Workers kumba leh ha u snem 2020 ban lait na ka jingsaphriang ka khlam.

Ha kajuh ka por, ula kyrpad ia ki Nongshongshnong ka Jylla ba kin iasnohkti lang bad ka Sorkar ha ka jingiakhun ia kane ka khlam da kaba bud ryntih ia ki jingbthah jong ka Tnad ka Koit ka Khiah bad ki Bor Pyniaid District.