Ther kylla u heh Congress, halor ka jingshah sospon

Nongpoh, 01 Lber:
Haba pynshai halor ka jingsospon da ka seng Congress, mynta ka sngi u Bah Minsing Makri, uwei na ki heh Nongialam ka seng Congress ha ka Nongpoh Block Congress Committee bad ha Ri Bhoi District, u la pynshai kylla da kaba ong ba kane ka jingshah sospon jongu na ka seng, ka dei tang ka jingleh marwei, da ki katto katne ngut ki nongialam ka Nongpoh Block Congress Committee ryngkat bad u Bah C.B Syiem kum u President.
Haba ai jingpynshai sha ki nongthohkhubor, u Bah Minsing Makri, u la ong ba ka jingkynnoh ba u la pynkhlemrain ia u MLA badon burom jong ngi, u Dr. D.D Lapang, kam don nongrim bad ka jingshisha, namar ha ka jingshisha kum u Nongialam ka Congress u la iatreilang bad u Dr. D.D Lapang naduh u snem 1977, ha kaba tad haduh kane ka khyllipmat um pat la ialeh pyrshah ia ka party ne ia u Dr. D.D Lapang.
Shuh shuh, u la ong ruh wat hapdeng kine ki kynrum ki kynram ba la mih hapoh ka party halor ka jingkynnoh ba u la pynkhein ia ki kyndon jong ka party, hynrei u Bah Min Makri, u la ong ba un iai trei shitrhem na bynta ka party bad ban wanrah nam jong badon burom ia u Dr. D.D Lapang ha ka election 2018.
Kane ka jingshah sospon na ka seng, ka dei tang namar ba don ki katto katne ki Rangbah ka party kiba la sngewthuh bakla ia ka jingtreikam jongu, hynrei watla katta, kum u Rangbah un dang shimkhia ia ka kam bad kloi ruh ban pdiang ia ka rai jong ka Disciplinary Committee, u la bynrap.