Shillong: Ka Dr Ampareen Lyngdoh, ka la thalain ia ka tnad bording jong ka sorkar jylla, halor ka jingbym tyngkai ia ka bor ding, ha ki bnai na la dep bad mynta ka la rai ban pynlip ia ka ding sha ka 8 kynta ha ka shisngi.
Haba kren bad ki lad pathai khubor, ka Dr Ampareen ka la ong ba ka long kaba lyngngoh ba ka sorkar ka la shim ia ka rai ban pynlip ding syndet syndet bad kane ka jingpynlip ding, ka ba long 8 kynta.
Ka la ong ba ha la por ba ka Congress ka don ha ka bor, shuwa ban shim ia kano kano ka rai ka ju don da ka jingiakren sani bha bad kam ju don ka jingpynlip ding, ha kajuh ka por na bynta kawei ka jaka hynrei ka ju pynbeit ban pynlip shiteng shiteng, hynrei mynta ngi iohi ba syndet syndet ki pynlip ia ka light na bynta shi jaka. Ka la ong ruh ba wat la ka don ka jingpynlip light hynrei ka bill light ka kiew arshah. “Wat ki lum ia ka bai light kaba heh hynrei kumno ki aidaw ba dang don ka pending due ia ki Company ba ai light ia ngi”. Ka la ong ruh ha ka por ba synshar ka Congress, haba don ka jingduna bording, ka sorkar ka ju shim ia ka rai ban pynlip light naduh u bnai Naiwieng ter ter, hynrei ka sorkar MDA ka ai sahuh ia ka bor ding, khlem tyngkai bad mynta pat ka pynlip syndet haduh 8 kynta.”
” Ha ki por mynshuwa da don ka jingpynlip light ka don ka jingkiew ka kam tuh kam thiem ha ka jylla bad ka sorkar mynta ka dei ban kiar na kane ka jingpynlip light na ka nuksa ba la jia ha ki snem ba la dep” ka la ong.
Phi don ban ong eiei?