Ther ka Russia, shah pyniap 53ngut ki riew paidbah ha Chernihiv

Ka jingther bom ka Russia, ka la pyniap ei ia 53ngut ki riew paidbah lem, ba kynthup ia 3ngut ki khynnah rit, ha kawei ka nongbah.

Ki nongshong shnong jong katei ka nongbah, ki la hap ban tep paidbah ia kitei ki met iap, na ka jinghiar thma jong U Vladimir Putin, President jong ka Russia. Katei ka jingjia, ka dei ha ka nongbah ba shatei jong ka Ukraine, ka Chernihiv. U Lat katei ka nongbah, U Viacheslav Chaus, u pynthikna, ia katei ka jingjia, kaba la pyniap ia ki 53ngut ki riew paidbah, hynnin ka sngi balang.

Ha kawei ka jingjia, la iohi ia ki riew paidbah, kiba iam paitdohnud, katba ki dang sei ia ki met iap, na kawei ka trok, ha kaba la tep paidbah ba Bucha, kaba don hajan jong ka nongbah Kyiv.