Shillong: Ka MP ka Congress na Silchar kaba dei ruh ka President ka All India Mahila Congress, ka Sushmita Dev mynta ka sngi ka la ther ia ka Bharatiya Janata Party (BJP) kaba kynnoh pyrshah ia u myntri kam pohiing ka jylla, u Bah HDR Lyngdoh halor ka jingkylla ktem awria ka hotel Marvelene Inn ha kaba u MLA ka Mawhati u Bah Julias Dorphang u la shah kynnoh donkti ban leh beijot ia ka khynnah ha kane ka hotel.
Haba kren sha ki lad pathai khubor mynta ka sngi ha ka nongbah, ka Dev ka la pynkynmaw ia ka myntri ka tnad Information & Broadcasting ka ri kaba dei ruh ka nongialam ka BJP ka Smriti Irani ia ka jingjia shah leh beijot ka khynnah ha Naliya ha Gujarat ka thain Kutch.
“U Myntri Rangbahduh ka ri u la leit jngoh ia ka Kutch, hynrei kam don shym la don kano kano ka jingkren ei ei ia ka jingjia. Ka kynhun ka SIT ka la thung hynrei ym don satia ba shah kem haduh kine ki sngi,” la kynnoh ka Dev.
Hynnin ka sngi ka Irani haba kren ha ka jingialang ka BJP ha Rynjah ka la ong ba katba ki nongleh beijot ki ialehkai ia ka burom ka ijot jong ki kynthei ha ka iing hotel u myntri tnad kam pohiing, ka bor jong ka ain pat kam shym leh eiei bad ka long tang ka nongpeitkai.