Ther jur u lap bah ha Ri Sohra, mynta ka sngi, tyrkhong ka Umiam

Shillong: Mynta ka sngi, ula ther shisha u lap bah Sohra, ha kaba katba kum ka jingkhein ba la ai da ka tnat peit mariang jong ka sorkar India, la pyni ba naduh ka por 8.30 mynstep haduh ka por 5.30 mynta ka janmiet, ka jinghap slap ha Sohra, ka poi sha ka 35.4 milimetre.

Hynnin ka sngi pat, haba khein naduh ka por 8.30 mynstep haduh ka por 8.30 mynta ka step, ka jinghap slap, ka poi sha ka 25.0milimetre ha Sohra.

Ha Shillong, ka jinghap slap naduh ka por 8.30 mynta ka step, haduh ka por 5.30 mynta ka janmiet, ka poi sha ka 18.8 mm, katba hynnin ka sngi, ka long 11.8mm; katba ka jinghap slap ha Umiam, ka duna shi katdei, ha kaba ka long tang 2.0 mynta ka sngi bad hynnin ka sngi, ka long tang 6.4mm.

Ka tnat peit mariang, ka maham ba lashai ka sngi, kan don ka jingkhie eriong, kaba beh ha ka jingstet kaba 50 haduh 60 Kilometre bad kan don ruh ka jinghap phria bad hap slap kaba jur ha ki bynta jong ka Jylla.