Ther jur bha u slap ha Sohra bad yn dang jur slap ha East Khasi hills

Shillong: Hynnin ka sngi, ka jinghap slap, ha Shillong, ka long 17.9mm, katba mynta ka sngi, ka long 2.8mm. Ha Sohra, ka jinghap slap, hynnin ka sngi, ka long 189.2mm, katba mynta ka sngi, ka long 85.6mm bad ha Umiam, ka jinghap slap mynhynnin ka sngi, ka long 9.0mm, katba mynta ka sngi, ka shu long bniop bniop, ong ka kyrwoh jong ka tnat India Meteorological Department (IMD).

Lashai ka sngi, kan don ka jinghap slap, kaba kham jur, ha ka nongbah Shillong bad ki jaka ba marjan. Ka tnat peit mariang, ka ai jingmaham ruh, ba kan don ka jingtied pyrthat, ka jingmeh leilieh bad ka jinghap slap kaba jur bad kaba jur bha, ha ki bynta jong ka jylla bad khamtam ha East Khasi hills.