Thep vote u bar jylla da ka jait Thabah

Nongstoin,
13 Jymmang:
Ha ka sng hat majai ka HYC Nongstoin Circle ka la ioh ban kem ia uwei u bar jylla u ba la ai jait ia lade da ka jait Tha bah, ia utei u bar jylla la tip kyrteng kum u Kopen dar Thapa u ba shong ba sah ha ka Shnong Nong dom West Khasi Hills ha ryngkat ka kurim jong u ka ba dei ruh ka long kmie Khasi. Na ka liang jong ka seng hadien ka jingbishar ka ba bniah ka la lap ba u tei u bar jylla u dei na ka jait Thapa bad ka seng kam shym la ioh satia kino kino ki kot ki sla ki ban pynshisha ia ka jingkam jong u tei u bar jylla ba u dei na ka jait Thabah hynrei lait noh tang ka EPIC thep Vote bad ia kawei ka sertiphiket Shnong na ka Shnong Nongdom kaba don da ka jait Thabah hadien ka kyrteng jong u.
Haba pyrshang ban kylli bad tohkit na kaei ka daw ba la pynlong ia u ban ai da ka jait Thabah ha ka EPIC, u tei u bar jylla u la saitkhuid ia lade bad u la ong ruh ba ka jingpaw jong ka jait Thabah ha ka EPIC thep vote jong u ka dei tang na ka daw jong ka jingbakla na ka Election Branch.
Ka seng kala kyrpad ia ki bor pyniaid shnong Nongdom bad kumjuh ruh ia ka tnad Election ba ki dei ban da khmih bad peit bha bad ba kim dei ban ithuh ia u tei u bar jylla kum u jait Thabah bad ban weng noh shi syndon ia ka jait Thabah na ka kyrteng jong u, ka seng kan nym shongthait hynrei kan iai buddien bad kan sa leit ruh ban ia kynduh bad wad jingtip na ki bor ba dei peit ha ka Election Branch khnang ban lap ia ki jingshisha baroh.