Thep vote da ki mobile

Shillong, 24 Jylliew:
Ka Election Commission of India (ECI) ka la ai jingmut ban pyndon kam noh da ki buit jingstad lyngba ka mobile technology ban wad bniah ia ki Electronic Voting Machines (EVMs) ki ba dei ban pyndonkam ha ka por election ha kylleng ka jylla. “Katkum ka jingai jingmut jong ka ECI baroh ki EVM ha ka jylla la dei ban leh da ka buit jngstad lyngba ki mobile” la ong u State Chief Electoral Officer (CEO) u bah Frederick R Kharkongor.
Ia katei ka buit la dep leh ha ki 330 tylli ki number ha ka Balloting Unit (BU) bad 288 tylli number jong ka Control Unit (CU), ha West Jaintia Hills District ha kaba kawei kawei kane ka machine la pyndait da ki bar code, bad kumba ju long ba ki mobile phone la pyndonkam ban thep ia ki jingtip bad kumjuh ka jingtip ia ka ID kaba paka bad man kawei pa kawei EVM. Hadien pat kin sa thep ia ki jingtip baroh na ka mobile bad pyndait bad ka server jong ka Election Commission. Kumta kawei pa kawei ka dur na kawei pa kawei ka EVM la tan dur bad thep ia ki jingtip sha ka central server ban leh ia ka stock bad wad bniah na ki EVM.
Kawei ka jingai jinghikai la dep ban ain a ka bynta ki heh jong ka Election Commission na ki 11 tylli District ryngkat ki briew kiba tbit ha ka ophis u Deputy Commissioner ka East Khasi Hills District ha ka sngi Thohdieng ha ka jingiadon lang u CEO u FR Kharkongor, Addll CEO W Khyllep, Jt CEO, T Lyngwa bad u DC u Bah PS Dkhar. Na ka liang u CEO bad u Additional CEO ki la pynpaw ia ka jingsngew kmen halor ka jingai jingtrei lang ki heh sorkar halor katei ka jingpyni buit halor ka jingdonkam ia katei ka lad ban pynkhlain ia ka rukom wad bniah ia ki EVM bad iaka stock da kaba pyndonkam ia ka buit thymmai ban pynsuk ha kaba pyniaid ia ka election.
Ki la pyntip ruh ba baroh ki District ki dei ban pynthikna ban pyndep hia katei ka jingai jinghikai hashwa ka 16 tarik u Naitung 2016 katkum ka jingphah ka ECI. Ha ka prokram ai jinghikai ha ka sngi Thohdieng, la pyllait ruh ia ka kot ai jingtip halor ki jingkylli kiba bun (Frequently Asked Questions (FAQs)) halor ka National Electoral Roll Purification (NERP) bad pynkhreh ruh na ka bynta ka jngpyntip bniah hapdeng ki Booth Level Officials (BLOs) bad kiwei kiwei.