Thep vote da ka kot ym da ki mashin, dawa ki MDC ka KHADC

Shillong, 20 Jylliew:
Ki MDC ka Khasi Hills Autonomous District Council (KHADC) ha kane ka sngi Balang ki la dawa ba ka Council ka dei ban pyndonkam noh da ka ballot paper na rukom mynshwa ha ka jingthep vote ha ka elekshon ha jaka ki mashin Electronic Voting Machine (EVMs) ha ka elekshon ban wan.
U MDC ka Maw khar u Bah James Ban Basaiawmoit, u la ong ba “Ka Council ka dei ban shim da ka rai ban dawa na ka sorkar jylla ban pynlait noh ia ka elekshon MDC na ka jingpyndon kam ia ka mashin EVM bad ban thep vote biang da ka rukom kaba rim da ka kot ban pynthikna ia ka elekshon kaba khuid bad kaba hok”. Ki MDC ki la ong ba ki mashin EVM lah da kaba suk ban leh tuh bad la kdew ruh ia ka jingjia ha ka elekshon ba dang shen ha ka jylla bad ruh ia ka PIL ba la ujor da president ka Janata Party u Subramaniam Swamy ha Supreme Court.
Haba wanrah ia ka motion, u Bah Ban u la ong ba wat ha ka Pynthorumkhrah constituency ki briew ki thep vote haduh ban da miet tang namar ba la don ka jingsniew ha ka mashin EVM bad bynrap ba 500 vote na kawei ka mashin EVM ym lah ban niew na Nongkrem constituency kaba la pynlong ia u MDC ban ujor sha ka Kashari halor kane.
Haba kyntu ia ka executive committee ban eksamin ia kane, u Bah Ban u la buh jingkylli kum ki mashin EVM lah ban pyndonkam ha kane ka ri haba kiwei ki ri kum ka Japan, UK, USA kiba shna ia ki EVM kim treh ban pyndonkam ha ka elekshon.
U MDC ka Nongkrem u Bah Lambor Malniang u la ong ba la don ka jingduna ha ka rukom treikam ki mashin EVM ha kane ka elekshon kaba la dep bad u la ong ba ka Council kam dei ban pyndonkam da ki mashin ha kane ka elekshon ban wan hynrei dei ban leh da ki kot kumba leh mynshwa.
Ka MDC ka Mylliem ka Kong Tielinia Thangkhiew ruh ka la ong ba lada thep vote da ka rukom kaba mynshwa kata da ka kot, baroh ki paidbah bad ki kyrtong kin hun haba ioh result.
Hynrei na ka liang ka sorkar jylla, ka la bthah ia ka KHADC ban thied ia ki mashin ban pyndonkam na ka bynta ka elekshon MDC ban wan.
U CEM ka KHADC u Bah PN Syiem u la pynthikna hapoh ka iing ba yn shim da ka rai halor kane ha ka dorbar ban wan jong ka Council.