Thep kyrteng u Conrad, Dikkanchi na ka bynta elekshon MP shiteng samoi

Shillong, 27 Iaiong:
Ka jingialap elekshon MP shiteng samoi na Tura ka la sdang ban shong shit hadien ki kyrtong ki la iathep kyrteng mynta ka sngi. U kyrtong ka NPP u Conrad K Sangma u khun shynrang u PA Sangma bam kwai ha u Blei, la thep kyrteng mynta ka sngi, kumjuh ruh ka kyrtong ka Congress ka Dikkanchi D Shira ka lok jong u Myntri Rangbah u Mukul Sangma.
Kine ar ngut ki la thep kyrteng ha u Returning Officer ka Tura u Pravin Bakshi. Ia u Conrad la synran lang kiba hiing hasem jongu bad ruh ia ka Dikkanchi.
Ka Dikkanchi ka la ong, “Ka juk jong u Purno ka la kut ha Garo Hills. Ki paidbah ka Garo Hills kin rai ban iaid da ka lynti ba thymmai”,.
Ka Dikkanchi ka la kyntait ba ka jingsngew synei kan treikam ha Garo Hills. “Ha ka khana ka elekshon shiteng samoi ha Garo hills, ka jingsngew synei kam ju treikam”. “Ngan trei ia ki jingangnud jong I Pa jong nga, iba dei u nongialam bad u nonghikai. Nga la shaniah tylli ha ki paidbah Garo hills kin pynthikna ia ka jingjop u kyrtong ka NPP”, la ong u Conrad hadien ba la dep thep kyrteng mynta ka sngi.
“Ki mat ki bym kut shuh bad ki jingeh, ngi dei ban kren ia ki jingduna ka sorkar jylla”, la ong.
U Conrad u la kubur ia ka jingangnud jong u kpa jongu ban thaw jylla kiba rit ban pynsted ia ka roi ka par. “I pa jong ngi I dei u briew ba pura, I don baroh ki jinglong kiba la iasam hapdeng jong ngi ki khun, I Agatha I long ba biria, u James u don ka jingthmu”, la ong u Conrad.