Thep kyrteng u Bah Pala, Pastor Basaiawmoit & u kyrtong BJP, CPI

Shillong, 21 Lber:
Mynta ka sngi Thoh dieng saw ngut ki kyrtong ki la thep kyrteng ban iakhun ia ka elekshon MP sha Lok Sabha na ka 1- Shillong parliament constituency. Kine kiba thep kyrteng ki long u bah Vincent H Pala na ka Congress, u bah Shibun Lyng doh na ka BJP bad u Pastor PBM Basaiawmoit kum kyrtong shimet.
Ia u bah Pala la synran lang da ki nongkit kam jong ka seng Congress lem bad ki nongkyr shan jong ka seng, ba kynthup ia U bah HDR Lyngdoh myntri sorkar Jylla. Ki nongialam ka seng congress ki la pyn sngew ba u kyrtong jong ka seng un jop ha kane ka kynti kaba mynta ruh.
Ha kawei ka liang, wat la ka BJP wat la kam shym la don ia ki nongmihkhmat hapoh ka iing dorbar thaw ain ka jylla, hynrei ka la sei ia u kyrtong jongka ha kane ka MP elekshon u Bah Shibun Lyngdoh.
U Pastor Basaiawmoit ruh u la thep ia ka kyrteng kum u kyrtong shimet, hynrei la kyrshan pat da ka kynhun CPF bad ar tylli ki seng sain pyrthei ka HSPDP bad ka KHNAM.
Hadien ba la dep thep kyrteng, u Pastor Basaiawmoit u la kam ba ka jingkyrmen ban jop ka don ha kane ka kynti bad u kyrpad ia ki paidbah ba kin ai ka jingkyrshan ia u ha kane ka kynti kaba mynta.
Bad uwei pat u kyrtong uba thep kyrteng mynta ka sngi udei u Bah Richard Shabong na ka CPI. Haduh mynta ka sngi ki kyrtong kiba la dep ban thep kyrteng na ka 1- Shillong LS kila poi sha ka san ngut. U Bah Paul Lyngdoh jong ka UDP, u la thep kham mynshwa.