Thep kyrteng nyngkong eh ki Kyrtong ka VPP ha kane ka Ilekshon sha KHADC na Ri Bhoi

Nongpoh, 29 K’lyngkot: Ki san ngut ki kyrtong jong ka Voice of the People’s Party (VPP) na Ri Bhoi bad ki ban sa aireng ha ki 5 tylli ki Konstitwensi kiba don ha Ri Bhoi, mynta ka sngi, ki la pyndep ia ka kamram ban leit thep kyrteng ha ki Returning Officer kiba don ha ophis u Deputy Commissioner ka Ri Bhoi ha Nongpoh.
Kitei ki san ngut ki kyrtong ka VPP bad kiba la pyndep ia ka jingleit ban thep kyrteng, ki kynthup ia u Bah Mathew Makdoh kyrtong na Nongpoh, u Bah Isynei Hinge na Umroi, u Bah Apkyrmen Lyngdoh Nonglait na Jirang, u Bah Banrikus Nongsteng na Umsning lem bad u Bah Kynjohlang Rangtong, u ban iakhun na Mawhati Constituency.
Ha katei ka sngi, ba kitei ki kyrtong ka VPP ki la leit ban thep kyrteng ka ophis u Deputy Commissioner ka Ri Bhoi, la iohi ba la leit ban synran ia ki da ki nongkyrshan ba radbah jong ka VPP, ha kaba ka jingthmu jong ki, ka long ban leit pynshngain ia kitei ki kyrtong ka VPP.
Hadien ba la dep katei ka jingleit thep kyrteng, haba shim kyllum ia ka jingkren jong kitei ki kyrtong ka VPP, ki la ong ba ka thong ba hakhmat eh jong ki ban iakhun ia kane ka elekshon MDC ka long ban wanrah ia ka sain pyrthei kaba khuid bad ka synshar khadar kaba shai. Ki la pynpaw ruh ia ka jingkitkhlieh ban pynjan ia ka synshar khadar sha ki paidbah bad ban peit bniah ia ki jingdonkam ki paidbah hapoh ka Constituency jong ki.