Nongpoh, 31 K’lyngkot: Katba ka jingthep kyrteng ka dang iaid ba long kum kita ki kyrtong, na bynta ban iakhun ha kane ka ilekshon ban long kum ki nongmihkhmat sha ka Khasi Hills Autonomous District Council (KHADC), kat haduh mynta ki la don 21 ngut ki kyrtong kiba la leit ban thep kyrteng bad napdeng kitei ki 21 ngut, la mih ka kyrteng jong u Bah Sosthenes Sohtun, MLA Jirang bad uba la hap ban iakhun ha kane ka ilekshon MDC, namar ba ki nongkyrshan jong u, ki la kwah ba un mih hi dalade bad ba un long sa kum u MDC.
Ha kitei ki 21 ngut kiba la pyndep ia ka jingleit thep kyrteng, ba kin long kum kita kyrtong ban iakhun ha kane ka ilekshon MDC, nalor u MLA Jirang u ban iakhun pat kum u MDC, hynrei sa u Bah George B. Lyngdoh, MLA barim ka Umroi, u la leit ban thep kyrteng ialade ba un long kum u kyrtong shimet ha kane ka ilekshon MDC.
Haba phai sha kiba la leit ban thep kyrteng mynta ka sngi, na ka NPP kiba la leit ban thep kyrteng, ki kynthup ia u Bah Sosthenes Sohtun, kyrtong na Jirang, ka Kong Rona Khymdeit na Nongpoh bad ka Kong Macdalyne S. Mawlong na Umsning Constituency.
Katba haba phai pat sha ki kyrtong ka UDP, kiba la leit ban thep kyrteng mynta ka sngi, ki kynthup ia u Bah Balajied Ranee, u ban iakhun na Nongpoh Constituency, u Bah Eddie G. Kharbani na Umsning, u Bah James Sylliang na Mawhati, ka Kong Naphishisha Marwein na Umroi bad u Bah Lee Bareh u ban iakhun na Jirang Constituency.
Kumba ka long mynta, ki Party kiba la pyndep ia ka jingleit ban thep kyrteng, ki kynthup ia ka NPP, UDP, Congress, VPP lem bad u kyrtong shimet na Umroi bad kaba sah mynta ka dei sa tang ia ki kyrtong ka BJP, kiba ym pat leit ban thep kyrteng, ia kaba la ioh jingtip ba kin sa leit ban thep kyrteng ha ka sngi Nyngkong ka Taiew ba wan.
Phi don ban ong eiei?