Nongstoin: Ka jingthep kyrteng jong ki kyrtong na ki Konstitwensi bapher bapher jong ka West Khasi Hills District, ka la sdang myn hynnin ka sngi, ha kaba ki kyrtong ki ban iakhun ia ka ilekshon sha ka Khasi Hills Autonomous District Council, ki la wan ban thep kyrteng ha khmat ki Returning Officer hapoh DC ophis ha Nongstoiñ.
Ia katei ka jingthep kyrteng la wan nyngkong eh da u bah Gigur Marthong kyrtong ka NPP na Mawshynrut Konstitwensi, u ba dei ruh ha kajuh ka por kum u MLA katei ka Konstitwensi bad hadien u bah Gigur, la wan sa u bah S. Rashir kyrtong ka Seng Congress na Mawshynrut Konstitwensi.
U bah Bajop Pyngrope kyrtong Congress na Rambrai haneng) U bah Gigur Marthong kyrtong NPP na Mawshynrut:Rupang
Katba na Nongstoiñ Konstitwensi pat la wan ban thep tang u bah Gabriel Wahlang kyrtong ka Seng Congress bad na Rambrai Jyrngam Konstitwensi tang u bah Bajop Pyngrope kyrtong ka Congress.
Haba iakren sha ki nongthoh khubor hadien ba la dep ban thep kyrteng na ka liang jong u kyrtong ka NPP u bah Gigur Marthong u la ong ba ki la don katto katne ngut kiba la pan ia ka tiket na ka Party NPP, hynrei kitei ki nongpan tiket hadien ba kim sngew shngain, ki la ailad noh ia u kum u MLA ba un long kum u kyrtong ha kane ka ilekshon MDC.
Katba na ka liang jong u bah Gabriel Wahlang kyrtong ka Congress na Nongstoiñ haba iakren sha ki nongthoh khubor u la ong ba kane ka la dei ka sien kaba lai ia u ba un iakhun ia ka ilekshon bad ha kane ka kynti u la khmih lynti ruh ba un ioh ia ka jingjop.
Shuh shuh u bah Wahlang, u la iathuh ruh ba ki mat kiba ha khmat eh ba un leh ynda u iohlad ban long kum u MDC ka dei ka Land Tenure System kaba donkam bha hapoh ka District Council khamtam ha ka rukom bad khyndew bad shyiap kadei ban don noh da ka ain kaba paka, khnang ba ka hok long trai jong ngi kan neh kan sah.
U kyrtong jong ka seng Congress na Rambrai Jyrngam Konstitwensi pat u bah Bajop Pyngrope, haba iakren sha ki lad pathai khubor, u la ong ba lada un ioh ia ka jingjop ha kane ka ilekshon, un iatrei ryngkat ryngkat bad u MLA na ka bynta ka bha ka miat jong ka dong ka thain hi baroh kawei.
Haba kylli ha kaba iadei bad ka jingshah kynnoh ba u dei u nongwei, na ka liang jong u bah Pyngrope u la ong ba ia kata ki paidbah hi kin sa bishar namar ba u la dei u nongshong shnong jong ka Hima Rambrai bad ha kaba iadei pat bad ka jingmih noh jong u bah JTS Thongni na ka Party u bah Pyngrope u la ong ba ha ka sain pyrthei, yn nym lah ban pynhun ia baroh kumta don kiba mih bad don ruh kiba rung bad ka jingmih jong u bah Thongni kan nym ktah ei ei ruh em ia ka Party.
Ym tang kata ha kaba iadei pat bad ka jingkynnoh ba u MLA u la leh donbor ban pynioh tiket ia u kum u kyrtong MDC, u bah Bajop u la ong ba ka dei tang ka jingkynnoh, hynrei kam shym la don kaba kum kata, namar ba ki primary unit bad kumjuh ka District ki la iaid katkum ka kyndon ha kaba ka MPCC ruh ka la rai ban ai tiket ia u.