Thep kyrteng ki kyrtong Congress na Mairang, Mawthadraishan

Nongstoiñ, 23 Naiwieng:
Ki ar ngut ki kyrtong ka seng Congress na Mairang bad Mawthadraishan ki ban sa ia ai reng ha ka election shiteng samoi sha ka KHADC, ha ka sngi balang jong ka taiew, ki la leit ban thep kyrteng bad bam smai ha khmat I Returning Officer ka Mairang I kong F. Lakiang, MCS.
Kitei ki ar ngut ki kyrtong ka seng congress ki kynthup ia u bah Ioanis Lyngdoh na Mawthadraishan ia kaba la wan bansynran lang da u President ka DCC bah Boldness Nongum, I President ka Mawthadraishan BCC I kong Irin Lyngdoh, bad u bah Lambok Nongrang na Mairang Constituency, ia kaba la synran lang da I Dr. Ureka Lyngdoh I ba long I Adviser ka Mairang BCC, U Secretary ka Mairang BCC u Bah M.K Mawlong bad kiwei kiwei.
Haba iakren bad ki nongthoh khubor hadien ka jingthep kyrteng na ka liang jong u kyrtong ka Mairang u bah Lambok Nongrang u la ong ba ka thong kaba ha khmat eh ka long ban ioh ia ka jingjop ha kane ka election da ka jingkyrshanlang ki paidbah hapoh ka thain Mairang Nongkhlaw hi baroh kawei.
Shuh shuh u bah Nongrang u la pynpaw ruh ia ka jingkrmen kaba skhem na ka bynta ban ioh rah ia ka thong jong ka jingjop ha kane ka election shiteng samoi kaba mynta, bad u la ong ruh ba lada un ioh lad ban mihkhmat sha ka District Council kum u MDC ka mat kaba kongsan ban leh ka long ban pynneh pynsah ia ki Riti Dustur ka hok longtrai ia ka khyndew ka shyiap.
Katba na ka liang jong u bah Ioanis Lyngdoh ruh u la pynpaw ba u don ia ka jingkyrmen ban jop ha kane ka election bad lada un long u nong mihkhmat un sa peit ia ki jingeh jong ka constituenct ha baroh ki liang bad na ka bynta ka District kumba ka la don lypa ia ka six schedule kaba long ka stih iada.