Shillong:Ka kyrtong jong ka National People’s Party, ka Dr Mehtab Chandee A. Sangma ka la thep kyrteng na ka bynta ka elekshon shiteng samoi ha Gambegre ka ban long shen ha kane ka sngi palei.
La synran ia ka da u kurim jong ka, u Conrad K Sangma uba dei ruh u myntri rangbah ka jylla Meghalaya bad u national president ka NPP.
Hadien ba ka la dep thep kyrteng, ka Dr Mehtab ka la ong ba baroh ki elekshon ki iapher, bad kum ka party ki leh katba lah ban poi sha ki paidbah nongjied. Halor ki jingthmu ba kongsan jong ka na ka bynta ka konstitwensi, ka la ong, “Ka jingthmu ba kongsan jong nga na ka bynta ka thaiñ ka dei ka roi ka par. Ka jingsumar pang kan long kawei pat ka jingthmu kaba kongsan na ka bynta jong nga.”
Haba pynkynmaw ïa kijuh ki jingpyrkhat, u president ka ri jong ka NPP, u Conrad k Sangma u la ong, “Man la ka elekshon ngi hap ban trei shitom; ngim lah ban shim ia kaei kaei kaba rit. Bad baroh ki nongialeh pyrshah ki long ki nongialeh pyrshah. Ngi hap ban pynthikna ba kum ka party ngin trei shitom. U kyrtong jong ngi u hap ban trei shitom.”
Ha kajuh ka por, u la khot ia ki paidbah jong ka thain Gambegre ban leh ia ka ‘jied kaba dei’. “Ha ka thain Gambegre baroh kawei ka donkam ia ka jingpyrkhat kaba bun. Nga kyrmen ba ha kane ka elekshon ki paidbah kin jied hok ban don ryngkat bad ka bor synshar bad ka sorkar,” u la pynpaw.
Halor ki lad jong ka seng bad ka jingkynthoh na ki paidbah, u la ong ba ka seng ka ioh ia ka jingkynthoh kaba bha bha. “Ngi dang ioh ia ka jingkynthoh kaba bha bad ngi kyrmen shibun ba ngin poi sha ka jingjop”, u la ban jur.
Hynrei u la kdew ba kim dei kiba sngewrit tang namar ba ka jingkynthoh ka long kaba bha. “Ngim dei ka jait seng ne ki riew shimet ki ban shim kylliang ïa kiei kiei bad kumta ngi hap ban trei shitom. Hynrei ngi ïoh ïa ka jingkynthoh kaba bha bha na ka konstitwensi,” u la ban jur.
Da ka jingïadon bynta lang jong ka tnga jong u myntri rangbah, ha ka jingïakhun, ka elekshon shiteng samoi na ka bynta ka thaiñ Gambegre ka la sngem shisha ha kaba kiwei pat ki seng ruh ki la buh kyrtong. Ka Trinamool Congress (TMC) ka la pynieng ia ka Sadhiarani M Sangma, ka MDC kynthei marwei ha GHADC bad kumjuh ruh ka tnga jong u Zenith M Sangma myntri myntri barim. Ka wan rung da ka jingshemphang kaba bun, namar ba ka la don lypa ha GHADC kumjuh ruh ka la ïakhun khlem jop na ka shuki arsien mynshwa.
Uwei pat u kyrtong u dei u Jingjang M. Marak jong ka Congress, uba dei u nongiarap ba jan jong u nongthaw ain barim ka Gambegre bad uba long ruh u MP ka Tura mynta u Saleng A. Sangma. U Saleng u la long u MLA na Gambegre lai sien lynter, kumta ka jingpoi bad ka vote bank jong u ka long kaba khlain bha, kaba pynlong ia u Jingjang u kyrtong uba khlain bha.
Ka BJP ruh ka la iasnohkti lang bad u MDC ka GHADC na Tura u Bernard N Marak ruh u la thep kyrteng ha kane ka sngi palei.
Ki la thep kyrteng ruh arngut ki kyrtong shimet – u Sengkrabirth Marak bad u Jerry A Sangma.
Phi don ban ong eiei?