Ka Krenila Marak, ka kurim jong U Jonathone N Sangma, ka la thep kyrteng mynta ka sngi, kum ka kandidet ban iakhun ia ka elekshon shiteng samoi na Williamnagar, East Garo hills.
Ka jingpeit bniah ia ka kyrteng jong katei ka kandidet NCP, kan long ha ka 11tarik Iaiong bad ka sngi ban weng kyrteng, kan long ha ka 13tarik Iaiong bad ka sngi thep vote, kan long ha ka 27tarik Iaiong, katba ka sngi niew vote kan long ha ka 1tarik Jymmang 2018.
La pynsangeh noh ia ka jingthep vote ha Williamnagar, na ka jingshah pyniap jong U Jonathone Sangma, uba la shah pyniap ha ka jingbthei bom IED, ha ka 18tarik Rymphang 2018, kaba dei ha shwa jong ka sngi thep vote, ha ka 27tarik Rymphang 2018.
Ka Williamnagar Constituency, ka don 32,345 ngut ki nongthep vote bad kitei ki kynthup ia 16,713ngut ki shynrang bad 15,632ngut ki kynthei.
Ki don 9ngut ki kandidet, ki ban iakhun mynta ka kynti bad kitei ki kynthup ia U Marcuise N Marak na ka seng NPP, ka Deborah C. Marak na ka seng Congress, U Mahamsing M. Sangma na ka seng UDP, U Santosh R. Marak na ka seng BJP, U Sengbath R Marak, U Lahatson N Marak, U Siljong R. Marak bad U Jan N. Arengh kiba iakhun kum ki kyrtong shimet.