Thep kyrteng 12 ngut ki kyrtong MDC, 9 ha East, 3 ha West Khasi Hills

Shillong,6 Rymphang:
Mynta ka sngi 12 ngut ki kyrtong ki ban ia khun ia ka elekshon MDC 2014 ki la wan ban thep kyrteng, na kiba la thep kyrteng ki long 9 ngut ha East Khasi Hills, hapoh ka ophis u Deputy Commssioner ka East Khasi Hills bad 3 ngut pat ha West Khasi Hills . La iohi ba ha katei ka jingthep kyrteng ki kyrtong MDC, ar ngut ki MLA ki la wan ban synran ia ki kyrtong jong ki, u bah Prestone Tynsong, myntri ka sorkar jylla uba long ruh u MLA ka Pynursla u la wan ban pynsynran ia ar ngut ki kyrtong u bah Jansing Tynsong u kyrtong ka Congress na Lyngkyrdem –Laitkroh bad u bah Anthony Kongwang u kyrtong ka Congress na Nongshken Konstitwensi. Ia u bah Lamphrang Blah u MDC ba mynta uba lon gruh u kyrtong ka Congress na Mawphlang la wan ban synran da u MLA katei ka konstitwensi u Bah Keneddy Khyriem.
Ki kyrtong kiba la wan ban thep kyrteng mynta ka sngi ki long u bah Edester Lyngdoh Nongbri ka UDP na Nongkrem, u bah Jansing Tynsong ka Congress na Lyngkyrdem-Laitkroh, u bah Anthony Justin Kongwang ka congress na Nongshken, u bah Lamphrang Blah-congress na Mawphlang- Diengiei, u bah Vicky S Lyngdoh u kyrtong shimet na -16 Nongthymmai, u bah Pynshai Manik Syiem, ka KHNAM na 21 Mawphlang –Diengiei, u bah Braston Kharbuli ka UDP na Mawphlang Diengiei, u bah Marbok Kharpran ka Congress na 6-Sohryngkham bad u bah Elphrin Lawai ka KHNAM na Sohryngkham. Na kitei ki kyrtong kiba la wan thep kyrteng 4 ngut ki dei ki kyrtong ka seng Congress, 2 ngut ka UDP, 2 ngut ka KHNAM bad uwei u kyrtong shimet.
Ha West Khasi Hills ki kyrtong kiba la wan thep kyrteng mynta ka sngi ki long u bah Kimfa Marbaniang, Tlidingstone Wanniang bad u Srally Rashir. U bah Marbaniang u la thep kyrteng kum u kyrtong ka Congress na 28 Rambrai Jyrngam constituency , u bah Wanniang, u MDC ba rim na 27 Nongstoin constituency kum u kyrtong ka Political Group (NIPG) katba u bah Rashir 29 Mawshynrut constituency kum u kyrtong ka Congress. Haba kheinlang baroh ki kyrtong ba la dep thep kyrteng mynhynin bad myngta ka sngi ki la poi sha ka 17 ngut.