Shillong: Ka Hynniewtrep Youths’ Council-Central Body hapoh ka jingialam u Samla Roy Kupar Synrem, Education Secretary, CEC, ka lah leit ban iakynduh ia ki Principal jong ki College mynta ka sngi ha Shillong, na ka bynta ban buddien ia ka jingthep klas ha ki Course bapher bapher bad ban kyrpad ia kine ki College ba kin pyrshang katba lah ban pynrung nyngkong eh ia ki samla pule trai Jylla, ha ki sobjek bapher bapher kiba don ha kine ki College.
Na ka liang ka Seng ka lah ioh ban ia kynduh ia ki Principal jong ka St Edmund’s College bad Shillong College bad kumjuh ruh ia ka Vice-Principal jong ka St Mary’s College, Shillong bad aiti ruh ia ka jingthoh halor kane ka bynta.
Ka Seng ka la ban jur ba lada don ki khynnah kiba dei na ka jaidbynriew Hynniewtrep, kiba ioh ia ki marks kiba biang, dei ban ailad shuwa ia ki khynnah samla Trai Jylla ban iohlad ban pule ha ki.
Hadien ka jingiakren, ki nongpyniaid jong ki College ki lah kular ia ki nongialam ka Seng ba kin pyrshang katba lah ban iarap ban pynrung klas ia ki khynnah Samla Hynniewtrep ha ki College jong ki.
Ka Seng lyngba kane ka kyrwoh ka kyntu ruh ia kiwei kiwei ki College kiba don ha kylleng ka Bri u Hynniewtrep, ba kin ialeh katba lah ban iarap ban pynrung Klas shwa ia ki samla trai shnong ha ki College jong ki. Na ka liang ka Seng kan sa leit ruh ban ia kynduh ia kiwei ki nongpyniaid College ha ki sngi ban wan halor kane ka phang, ong ka kyrwoh na U bah Marcos Marthong, Publicitu Secretary, HYC-CEC.