“Theh pisa ka sorkar sha ki kaikhlaw, sahteng ka baibam ki samla pule”

Shillong, 19 Rymphang: Ka Khun Hynniewtrep National Awakening Movement ka la pynrem jur ia kane ka sorkar jylla namarba haduh mynta kam shym la pyllait ia ka baibam jong ki samla pule ne kaba ki ong ka Scholarship.
Ka KHNAM ka la pynpaw ruh ka jing sngewkhia naba ka sorkar ka leh klet ia ki samla pule da kaba pynslem ia ka hok jong ki kaba ki dei ban ioh lyngba katei ka bhah kyrpang jong ki bad ka la ong ba ha ka jaka ban ai ia ka bhah jong ki samla pule ka sorkar mynta ka kham phai khmat pynban ban siew pisa sha ki kaikhlaw kiba la wan ban pyndem wait.
Katkum ka jingong ka KHNAM ka sorkar ka la pynslem ia ka bai bam jong ki samla pule naduh u snem 2014-15 bad ka la ong ruh ba ka la ia kynduh ia ki heh jong ka DPI ban wad jingtip halor katei ka baibam ki samla pule kaba la sahteng, bad ka la ong ruh ba kan wad jingtip lyngba ka RTI ban tip ia ka daw jong ka jingpynslem.