“The Tempest” sha ‘u Kyllang’ kaba kylla Khasi u Soso Tham

Shillong:U Myllung Soso Tham, u dei u nongthoh uba pawnam jong ka jaitbynriew Khasi bad la kha ïa u ha u snem 1873 ha Sohra, Meghalaya.

U Soso Tham, u dei u nongtbeh jingshai ha ka thoh ka tar jong ki Khasi bad u dei u nong thoh uba la pawnam ïa kaba ka Jaitbynriew kan ïai kynmaw junom ïa ka synniang ka jong u lyngba ki jingthoh ki bapher bapher.
Une u Myllung ula sdang trei kum u nong hikai skul bad ula hikai ïa ka sobjek Khasi ha Government High School, Shillong naduh u snem 1905 haduh ban da shong thait syndon ha u Naitung jong u snem 1931.
U Soso Tham udei u nongthoh uba la ïar ka pyrkhat ka pyrdaiñ ka jongu bad kane ka la paw lyngba ki jingthoh ki jongu ha kaba ula pynwandur ha kiba bun ki rukom bad ka jingthoh ruh ki long kiba kordor bha ïa kaba ula pynïasoh bad pynïakhleh lang bad ka riti dustur tynrai u Khasi.

Ula thoh ïa ki ar tylli ki Poitri kiba la pawnam bha kiba kynthup ïa ka “Ka Duitara Ksiar” ha u 1925 kaba kynthup ïa ki 46 tylli ki poitri lyngkot kaba don ïa ki jing pynwandur ïa ki kyntien, bilat bad 14 tylli ki poitri phareng kiba la pynkylla sha ka Khasi bad ka kot poitri “Ki Sngi Ba Rim U Hynñiewtrep” ha u snem 1936, bad kane kadei ka kot kaba kordor bad kaba kit jingmut bha bad kadei kaba la ngam jylliew bha ha kaba ïadei bad ka histori jong ki paid ka Bri u Hynñiew Trep.

U Soso Tham ula pynkylla ruh sha Khasi ïa ka Aesop’s Fables da kaba ai kyrteng ki Phawer u Aesop ïa kaba ïa kane ka kot kadei kaba la ïoh ïa jingïaroh na kiba bun balang bad kadei ruh kaba la pdiang da baroh.
Nalor kane ula pynkylla ruh sha ka ktien Khasi ïa ka kot jong u Charles Dickens ka “The Life of Our Lord” bad ïa ka kot jong u Shakespeare kaba la tip kum ka “The Tempest,” ïa kaba ula ai kyrteng “U Kyllang,” hynrei kaba sngewsih kane ka jingthoh kaba ula pynkylla sha Khasi ka la jah noh.

Ka jingtrei shitom une u Myllung ka la kyntiew shajrong ïa ka ktien Khasi bad la shim ruh ba une u Myllung udei u nongthoh uba khraw tam ha ka histori jong ka literature ha ka jylla Meghalaya bad ïa ki kot jong une u Myllung la pyndonkam ha ki skul bad ki kolej.

U Soso Tham ula khlad noh ha ka 18 tarik u Nohprah 1940 bad ka jingnoh synniang ka jong u ha ka pule puthi ka la long shisha kaba khraw bha bad kum ka dak ban pynsahnam ïa une u khraw pyrkhat ha ka thoh ka tar la pynïeng ïa u mot sahnam jong u Soso Tham ha u snem 1975 ha State Central Library Shillong bad wat ïa ka Hall ha kane ka jaka ruh la ai kyrteng da ka Soso Tham Auditorium.