Thaw Unit ka KSU ha Delhi

Shillong,16 Rymphang:
Hadien ka jingshah pyniap jong u samla Nido Taniam uwei na ki samla pule na Arunachal Pradesh ha nongbah Delhi, ki samla pule ka thain shatei lam mihngi kiba don ha nongbah Delhi ki la don hapdeng ka jingsngew syier bad sngew smiej ia ka jingshah thombor jong ki samla ka thain. Ban peit na ka bynta ka bha ka miat bad ka shongsuk shongsain ki samla pule Khasis kiba don ha nongbah Delhi , ha ka sngi saitjain jong ka taiew la seng ia ka Khasi Students Union (KSU) ba la tip kum ka KSU-Delhi unit. La seng ia ka KSU ha Delhi ha ka jingdon ryngkat lang jong u President barim ka KSU Central Body uba long ruh mynta u Chairman ka North East Students’ Organisation (NESO) u samla Samuel B Jyrwa . “Kane ka Unit kaba ngi dang seng thymmai kan peit ia ki mat ba donkam bad ki samla pule bad ki jingeh ba ki ia kynduh bad na ka bynta ka bha ka miat ki samla ka thain” ong u bah Jyrwa uba la ong ba ka jingdon ka unit ha nongbah Delhi kan pynkhlain bad pyniatylli ia ki samla pule kiba don ha nongbah Delhi.
Ha ka sngi saitjain u bah Jyrwa u la pynbam smai ruh haduh 51 ngut ki nongkitkam jong ka seng ba kynthup ia u President u Khynpham Kharlyngdoh, uba long ruh u President barim ka KSU-NEHU Unit, vice president – Simon Kharsohtun, general secretary – Rhembor Saibon, asst general secretary – Lambok Hynniewta, finance secretary – Eveningstone Myrboh, organizing secretary – Ridame Sari, education secretary – Nangsan Khongwir, publicity secretary – Pyndap Lawrynniang, socio-cultural secretary – Lurlam Jyrwa, girls’ in-charge – Bada Dkhar bad Phira Buhray nalor 40 ngut ki executive members.
U bah Jyrwa u la wan ia soh ruh ha ka rally bad ka jingialang duwai kyrpang ba la pynlong da ki samla pule ka thain shatei Lam mihngi ha Jantar Mantar, kum ka dak ka jingpyrshah ia ka jinglthombor ia ki samla NE bad ka jingshah pyniap u Nido Taniam.