Thaw tnat ki nongri dohkha

Nongpoh, 09 Jylliew:
Kan long ka jingkyr khu kaba khraw eh ia ki nongri dohkha, na Ri-Bhoi Sepngi, kiba la iasnohkti lang bad ka seng ki nongri dohkha, na ka District, kaba la tip kum ka Ri-Bhoi Fishery cum Agricultural and Farmer Association (RBFAFA).
Ha ka jingialang kaba la long ha Pathar khmah, ka RBFAFA ka la iohlad ban leit mih sha katei ka thaiñ sepngi ha ka 1 tarik mynta u bnai. La pynlong ia katei ka prokram ha ïing dorbar Patharkhmah, kaba hap hapoh ka Jirang Constituency. Ka jingthmu jong kane ka seng ka long ban pynkhlaiñ bad pyniar la u tnum u tyndai lem bad ka jingangnud ban wanrah ia ka jingiajan hapdeng ki paidbah bad ki tnat sorkar ka jylla bad ban kyntiew ruh ia ka jingtip bad jingshemphang ia ka rukom treikam kumno ban pynroi ka kane ka kam, katkum ka juk jingstad saian bathymmai, la ong u President kane ka Synjuk na Ri-Bhoi District, u Bah R Nongrum.
Ban pynkhlaiñ ia kane ka seng, na ka liang ki nongialam jong ka, ki la ibit ban suit ban shor thymmai sa kawei ka Circle, ia kaba la tip kum ka Ri-Bhoi Fishery cum Agricultural and Farmer Association, Patharkhmah Circle.
Ha katei ka sngi, la jied ia ki nongkitkam katei ka Circle thymmai, ha kaba la jied ia u Bah Edmin Dyia kum u President, Bah Major Thangkhiew, Vice President, Bah Precious Ranee, Secretary, Bah Wanhun Syngkli, Asst Secretary bad kynthup ia ar ngut ki Adviser, kata ia u Bah PN Roy Nongphlang bad u Bah Muslim Doloi. La pynskhem syndon ia kitei ki nongkitkam da u Bah R Nongrum, President ka District.
Kiwei kiba la sakhi lang ki kynthup ia u Bah B Sylliang, Bah W Shabong, DSP barim ka Ri-Bhoi District, Nongpoh, u Bah JP Ranee, Bah B Lyngdoh bad u Bah B Pamshong.