Thaw seng ki nongtrei ka Nazareth Hospital

Shillong,19 Naiwieng:
Ki nongtrei jong ka Nazareth Hospital Shillong mynta ka sngi ki la suit la shor ia ka seng jongki kaba la ai kyrteng kum ka Nazareth Hospital Workers Union (NHWU) ha ka jingialang kaba la long ha Bethany Society Complex, Shillong.
U President ba thymmai ka NHWU u Bah Kenneth Swer  u laong ba kane ka seng ka dei kaba nyngkong tam ha ka jylla ban thaw ha ki hospital ba pyniaid ki riew shimet.  U la ong ba shwa ban thaw ia kane ka seng, la twad jingmut shwa na ki stad ain ioh ka don kano kano ka jingwit bad hadien ba la ioh ia ka jingtip kaba biang,la lah ban seng ia ka ha kaba ha ka 16 tarik Naiwieng la ioh ia ka rejister na ka tnad  bylla ka sorkar.
U la iathuh ba ia mynta ki don haduh 140 ngut ki dkhot ka seng kaba kynthup lai ngut ki dkhot ba khot sngewbha na ka Thma U Rangli (TUR), ki nongtrei barim ka hospital bad na u Post Master General barim ka North East.
Shwa ia kane, u general secretary NHWU u Bah Silverter Iangrai u la ong ba ka jingthmu ba kongsan jong kane ka seng ka long ban pynlong ia ka jingiatylli hapdeng ki nongtrei ban peit ia ka jingbha jingmiat bad ka jingshah ban bein ia ki nongtrei. U la ong ba ka seng kan iakhun ruh ia ki hok jong ki nongtrei ba ki dei ban ioh katkum ka jingdonkam, kaba ban biang ban pynbiang ia ka iing ka sem.Shwa ia kane u Bah Ronnie Lyndem u la kyntu ia ki nongtrei kane ka seng ba kin iatreilang khnang ba kin lah ban weng ia ki jingeh ba ki iakynduh ha kano kano ka dur.