Thaw sa ka SMTF ban pynkhlain iakhun lehnoh

Shillong, 27 K’lyngkot:
Ka sorkar ka la rai ban pyntreikam da ka Special Multi-Task Force (SMTF) ne kata ka Special Force-10 khnang ban pynkhlain ia ki bor pulit ka jylla ban iakhun ia ki seng lehnoh.
U Myntri rangbah ka jylla u Mukul Sangma u la iathuh hadien ba la wai ka jingialang kynhun myntri mynta ka sngi Nyngkong, ba ka sorkar ka kwah ban pynsted ia ka jingpyntreikam ia ka Special Multi-Task Force, kaba ka sain dur ym ban shu pyndonkam haba donkam hynrei ban thaw kam ruh ia ki samla.
Kane ka SMTF kan don ka jingkhlain kaba 10 kynhun ne kompeni kaban long 1795 ngut kawei ka kompeni bad kawei ka kompeni kan long jong ki kynthei. U Mukul u la ong ba ka jingpynrung kam kan sdang shen bad yn pynmih ia ka jingpynbna noh ha kine ki sngi ban wan.
U la ong ba kane kan pynkhlain ia ki bor pulit ha ka jylla hadien ba la ioh ia ka jylla la 42 snem ha kaba ki police outpost ki don tang 6-8 ngut ki pulit.
“Ngi la phah ia ki jingdonkam sha ka Ministry of Home Affairs (MHA), halor kane ban pynkhlain ia ki police station ha kaba yn phiah ar bynta ia ki bad kawei kan long 80 ngut bad kawei kan don 40 ngut”, la ong u Mukul.
Ia kane ka jingpyntreikam yn leh ha ki bynta ba nyngkong ne phase I bad II bad ka sorkar ka dang ap ia ka jingmynjur na ka tnad ka sorkar pdeng.