Thaw RTIC ka JACATAM; bym don pisa ka sorkar

Shillong, 23 Nailar:
Ka jingialang  jong ki nonghikai bapher bapher ha kane ka jylla hapoh ka lama ka Joint Action Committee of All Teachers’ Associations of Meghalaya (JACATAM)  ha kane ka sngi Saitjain ka la rai ban thaw ia ka Right to Information-Committee (RTIC) na ka bynta ban wad jingtip sani halor ka jingjubab ka sorkar bym don pisa ban shimti noh ia ki nonghikai skul  ne provincialize ha kane ka jylla.
Ia kane ka Komiti la yn khlieh da u Babu RR Ronghang kum u chairman, katba u secretary la bynshet ha u Babu Kular Khongjirem, la ong u chairman ka JACATAM u Bah E.D Nongsiang.
U Bah Nongsiang u la ong ba ki nonghikai ki la sngew dei ban wad jingtip hi noh ban sngew hun namar ba man ka por ka jubab ba ju ioh na ka sorkar ka long beit bym don pisa. “Ka jubab na u Myntri Rangbah u Mukul Sangma dang shen ha ka jingia kynduh bad ki nonghikai ha ka 29 tarik, Naitung, 2015 ka long bym don pisa”, la ong u Bah Nongsiang.
Kumba ka long mynta ka sorkar ka pynlut kumba T. 500 klur shi bnai ban siew tulop sha ki nonghikai bad lada kan shimti ia ka baroh ki nonghikai ne provincialisation ka jinglut kan long kumba T.900 klur bad kan hap ban wad pisa sa T.400 klur eiei.
U la ong ba la thaw ia kane ka komiti na ka bynta ban wad jingtip bniah ia ka rukom lum khajna ka sorkar kaba pyndonkam na ka bynta ka pule puthi ne Education Cess.  Ka jingwad jingtip ka long ruh kumno bad ha kano ka dur ka Sorkar Jylla ka pynlut ban siew tulop ia ki nonghikai bad ka pynlut ruh na ka bynta ka jingkyntiew ia ka pule puthi ha ka jylla. katkum ka jingong u Bah Nongsiang hadien ba la ioh ia ka jingtip, ka JACATAM kan sa shong jingialang biang ban pule bniah bad leh ia kaba donkam.
U la iathuh ba ka jingialang ka la iatai ruh ia ka Service Rule  ka bym pat don satia haduh mynta ia ki nonghikai bad  ka JACATAM ka la dawa ba dei ban thaw noh ia ka. Ki don ki palat 14, 475 hajar ngut ki nonghikai skul kiba hikai ha ki 4700 hajar tylli ki skul kiba hap ha ka Ad hoc bad Deficit Pattern ha ka jylla baroh kawei. Ki nonghikai skul sorkar, skul Private bad skul SSA kin ym shah kynthup ha ka jingshimti ia ka kam hikai (Provincialisation).
Ka JACATAM ka la rai ban iashim bynta ha ka Teachers’ Day ia ki nonghikai ban pynlong da ka Sorkar Jylla ha ka 5 tarik, Nailur.