Thaw lad sorkar ioh iap thngan ki paidbah,ong u MLA Sohra

Shillong, 11 Jylliew:
U MLA ka Sohra u Bah Titostar Well Chyne u la kyntu ia ka sorkar ba ka dei ban thaw ia ki lad ki lynti ban ai jingiarap ia ki paidbah ka thain Sohra kiba shah ktah jur na ka jingkhang tih dewiong ka National Green Tribunal (NGT).
Haba shim bynta ha ka jingiatainia hynne ka sngi Balang hapoh ka iing dorbar, u Bah Chyne u la ong ki paidbah ka thain Sohra kiba im na ka tih dewiong mynta ki la sah ha ka jingbym tip shuh aiu ban jia namar ba kim don kam kim don jam shuh.
“La don ka jingiap briew ha ka thain Sohra namar ba kim tip shuh kawei ban jia ia ki naduh ba khang tih dewiong” la ong u Bah Chyne.
U la ong ba ki don ki longing ba kim iap thngan hadien ba la lut noh u khaw ba la thied ha iing namar ba kim don pisa shuh.
“Ka long kaba sngewsih kthang ban ioh sngew ia kine ki kyntien na ki briew jong nga”, la ong u Bah Chyne.
U la ong ba ka jingtih dewiong ha Sohra ka dei kaba la sdang la leh naduh 100 snem mynshwa.
“Kam don lad shuh ia ki nong-Sohra. Ka sorkar ka dei ban thaw ia ki lad ki lynti ban ai jingiarap kyrkieh haduh ba ka jingkhang tih dewiong kan kut ne haduh ba ki paidbah kin ioh ban sdang da kiwei ki kam”, la ong u Bah Chyne.
U la rah ruh ia ka mat halor ka jingbym lah jong ka sorkar ban thung ia ki headmaster bad ki principal ha kiba bun bah ki skul bad ki kolej sorkar ha kine ki ar snem ba la dep.
“Ka jingtreikam jong kine ki skul bad ki kolej ka la thut namar ka jingbym don ki Headmaster lane ki principal “, la ong u Bah Chyne.
U la ong kren ruh ia ka jingai iing baduk ia ki paidbah jong ka jylla.
“Ka tnad Housing ka sorkar kam shym la ai kano kan o ka skhim ha kine ki snem ba la dep”, la ong u MLA ka Sohra.
Ha kajuh ka por, u Bah Chyne u ka kyntu ia ka sorkar ba pdiang noh ia ki bill ba sahteng jong ka KHADC kiba la dep phah ha kine ki snem ba la dep.
“La don ki Bill kiba la pas da ka KHADC kiba sah teng bad ka sorkar haduh kine ki sngi”, u la ong bad bynrap ba ka sorkar ka dei ban ai ia ka jingkyrshan kaba pura ia ki Autonomous District Councils (ADCs) kiba ieng ban iada ia ki trai jaka ha ka jylla.