Thaw kynhun ki 8 ngut ki MDC shimet ka KHADC, da ka UDA

Shillong, 3’lyngkot:
Ki MDC shimet ka KHADC, ki la ia ka kynhun para ma ki bad ia katei ka kynhun ki ai kyrteng kum ka United Democratic Alliance (UDA). Ia katei ka kynhun ki la thaw mynhynnin ka sngi ka 2 tarik u Kyllalyngkot, ha kaba U bah Latiplang Kharkongor MDC ka Nongthymmai u dei u nongialam jong katei ka kynhun bad u bat kum u Chairman, katba u MDC ka Mawkynrew u bah Banteidor Lyngdoh u bat kum u Secretary.
Ha katei ka kynhun ki don 8 ngut ki MDC shimet bad kitei ki long ka kong Grace mary Kharpuri, MDC ka Nongshken, u bah James Sylliang MDC ka Mawhati, u bah L.G Nongsiej MDC ka Nongstoiñ, u bah Morningstar Mawsor-MDC ka Mawshynrut, u bah Victor Rani MDC ka Jirang bad u bah Hadrian Lyngdoh MDC ka Mawkyrwat nalor kitei ar ngut (Latiplang & Banteidor). U bah Albinus Lyngdoh MDC ka Umroi um donlang hapoh katei ka kynhun naba un rung noh sha ka seng UDP.
Haba ia kren bad u Chairman katei ka kynhun thymmai ha KHADC u bah Latiplang Kharkongor u la ong ba ka jingthaw ia katei ka kynhun ka dei namarba ki ju mih ki khubor hamsaia ban ong ba uta u MDC shimet u la don sha kata ka kynhun bad uta sha kawei pat ka kynhun, hynrei ban lait na ka jingiatharai sniew iwei ia iwei ki la rai ban thaw beit da kawei ka kynhun ba kin ia sngewthuh jingmut lang lada leit shano shano ruh.
U la ong ruh ba ka ju mih ka jingiakam bun paid hapdeng para MDC ha kaba uwei u ong ba bun paid ka seng jong u bad uwei pat ruh u ong ba kham bun paid ka seng jong u hynrei ha ka jingshisha u la ong ba dei ki MDC shimet kiba bun paid ha KHADC bad katei ruh ka dei ka dawbah ba la thaw ia ka UDA.
Shuh shuh u la ong ba kumba ka long haduh mynta ka rai jong ka UDA kaba don 8 ngut ki MDC ka dei ban kyrshan bad ban pynskhem ia ka PDF ha KHADC kaba ialam da u bah Pynshngaiñ N Syiem kum u Chief Executive Member. Lah ban kdew ba ha kine ki khyndiat sngi ki khubor ki la her sted ba ka la don ka jingthmu ban pynkhyllem CEM ia u bah Pynshngaiñ da ka seng UDP bad kumjuh ruh da ka seng Congress. Lah ruh ban kdew ba mynta hapoh ka kynhun PDF ha KHADC ki don mynta na ka seng UDP, BJP, NCP, HSPDP, 8 ngut ki MDC shimet bad don ruh u MDC shah sospon ha ka seng Congress u bah Pynshngaiñ N Syiem.