Nongpoh: Na ka bynta ban pynpaw ia ka jingpyrshah kaba jur halor ka jingthmu ka sorkar jylla ban wanrah ia ka Casino ne ka jaka ‘Khalai’ ha Ri Bhoi, ki nongialam ka Synjuk ki Rangbah Shnong Ri Bhoi District, mynta ka sngi ki la khot ia ki heh nongialam jong ki saw seng, kiba kynthup ia ka KSU, FKJGP, HNYF bad RBYF, kata na ka bynta ban pan jingkyrshan halor ka jingthmu jong ki ban pyrshah ia katei ka jaka ‘Khalai’, kaba la thmu wanrah ka sorkar ha Ri Bhoi.
Ha katei ka jingialang hapdeng ki nongialam jong kitei ki 4 seng bad ki nongialma jong ka Synjuk ki Rangbah shnong, ki la lah ban thaw ia ka kawei ka kynhun pyrshah ‘Casino’ bad kaba la tip kum ka Joint Action Committee against Casino, ia kaba u Bah B.B Makdoh, President ka Synjuk ki Rangbah shnong, u la long kum u Chairman katei ka JAC bad u Bah Ferdynald K. Kharkamni, President ka KSU ha Ri Bhoi kum u General Secretary lem bad kiwei pat ki dkhot ha katei ka kynhun, kiba dei ki nongialam jong kitei ki 4 seng bad ki nongialam shnong.
Haba kren sha ki lad pathaikhubor haba la kut katei ka jingialang, ki nongialam 4 seng ha ryngkat ki nongialam ka Synjuk ki rangbah shnong, ki la pynpaw ba kin iai pyrshah beit ia katei ka ‘Casino’, wat haba ka sorkar ka la thmu ban pynurlong jubor ia katei ka Casino ha Ri Bhoi. U la pynpaw ruh, ba ha katei ka jingialang, ki nongialam 4 seng bad ki rangbah shnong, ki dang khmieh lynti ba ka sorkar kan wanrah da kino kino ki lad ki lynti, ki ban iarap ia ki khun samla ha ka iohkam iohjam ne ki lad ai jinghikai, kiba long kum ki jaka pule bad ki jaka sumar, hynrei plak, ka sorkar ka thmu pynban ia ka Ri Bhoi ban pynlong kum ka ktem ‘Khalai’.
Dei halor kita ki nongrim baroh, ka JAC hapdeng ki 4 seng bad ki nongialam shnong ha Ri Bhoi, ki la shim ia ka rai ban pyrshah beit ia katei ka ‘Casino’ bad halor kata ka jingpyrshah jong ki, ki la shim ia ka rai ban phah dorkhas sha u Myntri Rangbah ka sorkar jylla, na ka bynta ban pyrshah ia katei ka ‘Casino’ bad ban pynpaw ba ka JAC hi kam ailad ia katei ka jaka ‘Khalai’ ha Ri Bhoi, u la bynrap.
Lada ki paidbah ki don ki khmat baiohi bad don ki shkor ba iohsngew biang biang ,ki ladei ban pynrem kput ne ai jingsneng kaba tyngeh ia Kane ka sorkar khamtam ka NPP bad UDP .
Hato ka ‘Casino’ Kan wanrah ia ka jingbha ha ka imlang sahlang? Bad Kan nym don ka shong suk shongsain, Kan pynjot pynpra ia ka ing ka sem. Ngi dei ban ai ka jingkyrshan ba pura ki 4 tylli ki Seng bad ka synjuk ki rangbah shnong kiba iohi jngai ia ka lawei Jong ka ri bad ka jaitbynriew.