Thaw komiti, halor ka bai sumar briew

Shillong:U Myntri ka tnad ka koit ka khiah, u bah Alexander L Hek u la iathuh ba ban wad ia ki lad ki lynti ban pynduna ia ka dor bai sumar ia ki briew ba iohpang Covid ha ki hospital jong ki riew shimet la shim ia ka rai ban thaw da ka Consultative Commitee.

U bah Hek u la iathuh ba ia kane ka Commitee, yn khlieh da u Pricipal Secretary ka tnad ka koit ka khiah, ha ryngkat ki dkhot na ki hospital jong ki riew shimet ka ba la ai por ban wad ia ki lad ki lynti tang hapoh shitaiew.
U bah Hek u la iathuh ba mynta ka sngi na ka liang jong u, u la pynlong ia ka jingialang bad ki nongpyniaid ia ki hospital jong ki riew shimet ban ia kren sani halor ka jingrem ka dor sumar ia ki nongpang covid ha kine ki hospital.

“Ha kane ka jingialang la shim ia ka rai ban thaw ia ka consultative committee, ban lad ban wad ia ki lad ki lynti ban pynduna ia ka bai sumar covid ha ki hospital jong ki riew shimet” u la ong.

U bah Hek u la kyntait ruh ia ka jingkynnoh ba ka sorkar ka la pynbor ia ki briew ba kin shim Vaccine.”Ngim lah ban pynbor iano iano ruh ba kin shim vaccine hynrei ka dei ka mon jong ki bad na ka liang ka sorkar ka shu kyrpad ia ki briew ba kin shim vaccine” u la bynrap.