Thaw ki nongthoh ia ka kynhun ban dawa ia la ki hok

Shillong, 10 Jylliew:
Ki nongthoh khubor na kane ka thain shatei lammihngi ka India ki la thaw ia ka Northeast India Federation of Journalist (NIFJ) ban iakhun lang da kawei ka bor ia ki hok jongki.
Ia kane ka kynhun la thaw hynne ha ka Regional Seminar-cum-Workshop’ ba la pynlong da ka International Federation of Journalist (South Asia Media Solidarity Network).
Katkum ka jinglam phang jong kane ka kynhun thymmai ki nongthoh khubor, ka jingthmu ba kongsan ka long ban iada bad ban iakhun ia ki hok jong ki nongthoh khubor.
Kane ka seng thymmai jong ki nongthoh jong kane ka thain shatei lammihngi ka India, ka la ieng halor ka nongrim ban iakhun ia ki hok bad ka jingshngain jong ki nongthoh khubor.
Ha kajuh ka por ha ka sngi pynkut hynne ka sngi ia kane ka seminar, ka myntri ka tnad Labour ka jylla ka Kong Ampareen Lyngdoh ka la ban ia ka jingdonkam jong ki nongthoh ban iakhun ia ki hok jongki.
‘Nga sngew ba ka dei ka hok jong ki nongthoh khubor ban iakhun ia ka hok jongki”, la ong ka Kong Ampareen bad ka la bynrap ba ka sorkar kan sa leh ia kaba donkam ban pynbha ia ka jingbit jingbiang jong ki nongthoh khubor.
Haba kdew ia ka jingai jingmut ka Majithia Wage Board ia ki nongthoh khubor, bad ki nongtrei kot khubor, ka kong Ampareen ka la ong ba ka sorkar kan pyrshang ban bud ia ki jingai jingmut kynthup ban thaw ia ka committee jong ki lai liang.
Ka la pynthikna ba ka sorkar jylla kan pyrshang ruh ban peit ia ka jingbit jingbiang jong ki nongthoh khubor ba kin ioh ia ki lad ki kabu kum ka bai sumar, ka iing ka sem nalor kiwei.