Thaw khyrdop ka Lawsohtun

Shillong, 15 Nailur:
Ban khang lad na ki kam awria, kam pynjot pynduh ia ki khaw ki btap bad ka jingrung laitlan ki kali katba mon sha khlaw shong Law Sohtun, kaba don marjan bad ki lum jingtep, ne jingthang briew jong ki Balang bapher bad Seng Khasi, mynta ka Dorbar Shnong ka la shna noh da ka khyrdop, ban iada ia kum kitei ki jingjia kiba ju jia ha kitei ki jaka man ka por.
Halor ka jingshna iaka gate ne jingkhang khyrdop, shuwa ban rung ha katei ka jaka ,ka shnong ka pynshai ba kam thmu ban pynthut ne khang lynti ia ki jingleit tep briew ne thang briew hangtei; hynrei ban iada na ki jingsniew. Kumta ka shnong ka kyntu ba naduh ba la pyllait ia kane ka khubor,ba kino kino ki Balang ne ka Seng Khasi, haba ki thmu ban leit tep briew ne thang briew hangtei napoh ka Laban Area kin sngewbha ban ai da ki jingthoh bad kyrteng ba pura jong u ne ka baiap sha u Rangbah Shnong ne Secretary Shnong Law Sohtun khnang ba kin lah ban leh ia kaba donkam. Ka Dorbar Shnong Law Sohtun ka pynkynmaw ruh ba ka sa shna khyrdop noh namar la don teng ka jingjia ba kiba nabar ka thain, ki wanrah met iap ban tep ha kitei ki lum;hynrei dei tad haba ki samla shnong pyntip sha ki bor shnong la lah ban leh ia kaba donkam.