Thaw ka sorkar da ka kynhun tohkit, halor ka jingkhlad i khyllung ha Ganesh Das Hospital

Shillong: U Symbud myntri rangbah ka jylla, u bah Prestone Tynsong, u iathuh ba ha ka jingialang kaba la long mynta ka sngi, ka sorkar jylla, ka la shim ia ka rai ban thung da ka kynhun tohkit (Inquiry Committee) halor ka jingjia ha Ganesh Das Hospital ha ka 28 tarik u Naitung 2020.

Haba iakren bad ki lad pathai khubor, u la iathuh ba ha kane ka kynhun tohkit, yn ialam da u director ka tnad ka koit ka khiah, u Dr Aman War bad ia ka kaiphot halor kane ka jingjia, ka sorkar ka la bthah ba ki dei ban pyndep noh hapoh ka 2 taiew.

Kum ban shu pynkynmaw ha ka 28 tarik u Naitung 2020 ha ka por kumba 7:30 janmied iwei i khyllung i la khlad noh ha kpoh jong ka kmie ha Ganesh Das Hospital. Na ka liang kiba ha iing jong kane ka long kmie kaba dei na ka Shnong Mawlai Mawtawar, ki la kynnoh ba ka jingkhlad jong ine i khyllung ka dei na ka jingpynslem jong kane ka Hospital ban ai jingsumar.

Ha kawei ka bynta ha ba iakren bad ki lad pathai khubor u bah Prestone u la iathuh ka sorkar jylla mynta ka sngi hadien ka jingiamir jingmut bad ki nongpyniaid jong ka NEIGRIHMS Hospital, shen kin sa buh noh ia ka Plasma Bank ha NEIGRIHMS hospital bad ka kam halor kane ka bynta, ka dang iaid shakhmat.