Thaw ka NPP, ïa ka kam bamsap kaba thymmai, ong ka BJP

Shillong:Ka Bharatiya Janata Party (BJP) ka la khyrwit kylla ïa ka rukom treikam pyrshah ïa ka seng National People’s Party (NPP) hadien ba u Nongïalam ka NPP u Conrad K Sangma, dang ha kine ki sngi, u la thalaiñ ïa ka BJP bad ong ba ka BJP kan ym shuh ban jop tang 2 ngut kumba la long ha u snem 2018 hynrei kan leh khambha shuh shuh ha kane ka ilekshon MLA ba mynta u snem.

Haba khyrwit ïa ka NPP, kaba la long ka paralok ba la donlang hapoh ka Sorkar la san snem hapoh ka Sorkar khleh khawlang, ka BJP ha ka kyrwoh khubor ka la ong ba u Sangma udei ban pyrshang ban ïada ïa la ka jong ka seat na South Tura ha ka jaka ban pyrshang kheiñ pohdor ïa ka result jong ka BJP.

“Ka NPP ka long kaba la paw bha hapdeng ki paidbah ka Meghalaya ban thaw ïa ka rukom bamsap kaba thymmai ha ka jylla. Ha ka jaka ban thaw ki surok sha ki shnong, ki Nongïalam ka NPP ki la lah ban thaw ïa ki surok shala ki jong ki ïing. Ha jaka ban ai bording sha ki surok, ki Nongïalam ka NPP ki la lah ban pynthaba ïa la ki jong ki ïing ki sem jong ki kiba bun. Ha ka jaka ban thaw ïa ka jylla, ki la lah ban thaw pynban ïa la ki jong ki jingdon jingem,” kynnoh ka BJP ha ka kyrwoh khubor.