Thaw ka MHA da ka komiti, ban pyntreikam ia ka AFSPA

Shillong, 13 Nohprah:
Ka tnat kam poh iing jong ka sorkar India, ka la thaw da ka High Level Committee ban peit ia ka jinglong jingman ka ri lum Garo ha kine ki sngi bad ban ai ruh ia ka jingai jingmut hato la ka donkam ne em ban pyn treikam da ka Armed Forces Special Powers Act (AFSPA) ha ri Lum Garo kumba la hukum da ka Meghalaya High Court ha kine ki khyndiat sngi ba la dep. Ki tyllong khubor ki la iathuh ba ki dkhot jong katei ka HLC shen kin leit jngoh ia ka ri Lum Garo ha kine ki khyndiat sngi ban wan bad kin sa ai ia ka ripod jong ki kaei kaba ki lap. Ia katei ka komiti la ong ba yn khlieh da u Home Secretary, ka Ministry of Home Affairs, iathuh ki lad khubor. “Kum ka jingsngap ia ka hukum ba la pynmih da ka High Court, ka sorkar pdeng ka la thaw ia ka High Level Committee ban lum jingtip hato ladonkam shisha ne em ban pyntreikam da ka AFSPA ha ri Lum Garo” iathuh ki lad khubor kiba lapyntip ruh ba ka komiti ka la pan ruh ia ka kopi jong ka hukum ka Meghalaya High Court.
Shuh shuh ki lad khubor ki la iathuh ba ka sorkar pdeng kam shym la kwah ban pyntreikam da katei ka ain shipai ha ri Lum Garo naba ka la shim ba katei ka ain kam dei ka jubab ban pynkut ia ki kam lehnoh ha ri Lum Garo. Lah ban kdew ba ka sorkar jylla kynthup ki sengbhalang ki la pyrshah jur ia ka jingthmu ban pyntreikam da ka ain shipai ha ri Lum Garo, “Ka AFSPA kam dei ka jubab ka sorkar jylla ka lah ban trei hi ryngkat ki bor pahara na ka sorkar pdeng” ong ka kong Roshan Warjri,myntri ka tnad pohing ka sorkar jylla. Katba ha kawei pat ka khubor la iathuh ba ka sorkar pdeng mynta ka dang pyrkhat ia ka jingtyrwa ka sorkar jylla ban phah shuh ki bor pahara ha kane ka jylla ban ia khun ia ki lehnoh.