Thaw ka KHADC da ka KHSBC ban tih bniah ia ki jingeh khappud

Shillong, 23 Naitung:
Ka KHADC ka la thaw ia ka Khasi Hills Special Boundary Committee (KHSBC) na ka bynta ban tih bniah ban lum ia ki jingtip kiba iadei bad ki jingeh ha ka thain khappud jong ka Meghalaya bad ka Assam.
Na ka liang u Executive Member ba peit ia ka Elaka u Bah KP Pang ngiang u dei u chairman ka committee katba u Joint secretary ka KHADC u Bah RS Wanniang kum u secretary ka committee.
Ki dkhot kane ka committee ki long kito ki MDC kiba ki jaka jongki hap ha khappud bad ka Assam nalor ki khlieh nongsynshar jong ki Hima bad ki Shnong.
“Ngi la thaw ia kane ka Committee da ka jingthmu ban pynthikna ia ki jingeh kiba don ha ki thain khappud bad ka Assam. Ngin pyrshang ruh ban wad ia ki jaka ba shisha na ki Hima bad ki shnong kiba la shah kyntur ha ka Assam”, la ong u Bah Pangngiang hadien ba la wai ka jingiakynduh bad ki khliehnongsynshar shnong synshar Hima.
U la iathuh ba u la bthah ia ki Hima bad ki shnong ki raij ban ai ki jingtip ba bniah bha halor ka jingwan skud jaka ka Assam.
“Ngi la pan ia ka jingtip na ki khlieh nongsynshar jong ki shnong bapher bapher ha kaba ki paidbah ki leit rejister ia ki jaka jongki sha Assam”, la ong u EM ka Elaka.
U Bah Pangngiang u la iathuh ba ka bthah ia ki Hima ban sdang noh ia kane ka kam ban rejister ia ki jaka ha man ki shnong.
“Kane ka dei kawei na ki lad ban pynthikna ba ki jaka kiba hapoh hapoh ka jingpeit jong ka Council kim dei ban leit sha Assam. Hadien ba la rejister ia ki jaka da ki Hima, ka KHADC kan sa leh ia ki kam ban rejister ia ki jaka ki puta khnang ban khang lad ia ka jingwan skud ka Assam” u la ong.
U EM u la ong ruh ba ki la bthah ia ki Hima ban nym ai wai ia ki jaka sha kino kino ki dkhar ban buh karkhana ne kino kino ki kam.
“Ngi la iohi ha ki snem ba la dep, ba bun ki bar jylla ki la ialam bakla ia ki paidbah nongkyndong baduk ban shim wai ia ki jaka jongki na ka bynta ka jingthmu barieh jongki”, la ong u Bah Pangngiang.
U la ong ba ia kane ka kam, la buh thong ban pyndep hapoh hynriew bnai.
“Ka committee kan shong jingialang man ka lai bnai ban iakren ia kane ka jingeh ha khappud”, la ong u EM ka Elaka.