Thaw ka GNLA da ka Eagle Hunters

Shillong, 10 Nailar:
Ka GNLA mynta ka la thaw sa da ka kynhun kaba kham khlain ban ia khun pyrshah ia ki pulit, bad ha kawei ka kynhun kin don 7 ngut ki shipai jong ka, kiba trei la ki jong ki kam ha la ki jong ki jaka ba la bynta ia ki. Katei ka kynhun ka dei kaba la tip kum ka Eagle Hunters.
Ka GNLA ka la thaw ia katei ka Eagle Hunters kaba 7 ngut shi kynhun kyrpang tang ban hiar thma ia ki pulit ha kano kano ka por bad ha kano kano ka jaka. Haba pyllait paidbah ia ka jingthoh ha Facebook ka GNLA ka la ong ba ka jinghiar thma ki dkhot jong ka ha ka sngi saitjain ia ki pulit ki dei tang ki jingjia kiba rit.
Hynrei kitei ki Eagle Hunters kin ym pynkut tang ha ka jingmynsaw hynrei kin khyrwit haduh ba ki pulit kin da kyllon iap. Ka la ong ba kam pher katno ngut ki pulit kin don katno kin ia bun ha ka por ban jia ka jingjia. Ka la byrngem ba ka jinghiar thma kan long kham palat ban ia kaba ka NSCN(K) ka hiar thma ia ki shipai India ha Manipur.