Shillong:U Myntri Rangbah ka jylla u Conrad K Sangma u la ong ba ka jingmih ka jingjia ha Lad Umsyiem hynnin ka sngi ka mih dei na ka jingthaw jingkulmar ki briew kiba khaïi tuh sha Bangladesh.
Hynnin ka sngi, ka la don ka jingiahuri hura ha Lad Umsyiem ha jaka ba buh ktem ki BSF, hadien ba la kynnoh ba ki shipai BSF ki bat ia kali ba thmu leit sha Dawki bad rah ia ki samla sha ktem da kaba tied ia ki, bad hangne ka la mih ka huri hura haduh ba ki paidbah ki la tur sha ktem ki BSF bad ka la pynlong ia ki ban siat kuli sha suin ban pynpra ia u paidbah.
“Kane ka jingjia, ka long hadien ba ki don ki katto katne ki riew shimet kiba thmu shalan tuh ia ki tiar sha Bangladesh, bad ki BSF kila ioh kurup bad hadien kane, la don ka jingther maw na ki paidbah sha ki BSF bad ha kata ka por, ki BSF kila siat kuli sha suin saw sien ban pynpra ia ki paidbah”, la ong u Conrad.
U la ong ba ki la don kiba mynsaw tangba kam dei na ka jingsiat ki shipai BSF hynrei ka dei na ka jinghuri hura. “Mynta ka jinglong jingman ka la long jai jai bad ngi long kiba peitngor bha”, la ong u Conrad.
Ha kajuh ka por, u symbud myntri rangbah u bah Prestone Tynsong u la iathuh ba la don saw ngut kiba mynsaw, ar ngut na ki paidbah bad 2 ngut na ki BSF. “Ka jingjia ka mih hadien ba ki BSF kila kurup ia ki jain saree ba thmu ban shalan tuh sha Bangladesh bad kila kurup ruh ia ka kali sha ktem jongki bad u nongniah u la phet noh bad hadien katto katne por, kawei ka kali paidbah ka la sniew hajan katei ka ktem (Lad Umsyiem) bad ki BSF ki kren ia kine ki briew bad don ka jingiapyni nia bad, kane ka la ialam pynban sha ka huri hura”, la ong u bah Prestone uba peit ia ka tnad kam pohiing ka jylla.
U la ong bai a mynta ym pat lah ban ong kumno ka jia bad ym pat lah ban kren pynkut halor kane ka jingjia bad la bthah ia u SP ban peitngor ia kane ka jingjia. “Mynta ngi dang ap ia ka ejahar ba lah ban ujor da ki paidbah ne ki BSF halor kane ka jingjia”, la ong u bah Prestone.
U la ong ba haduh mynta ym pat lah ban shu pynkut nia khamtam ba ka jia ha ka por mynmiet ha kaba ka lah ban don ka jingiaktah kti hynrei sngewnguh ia u Blei ba ka jingjia kam don kano kano ka jingmynsaw kaba jur. U la ong ba un khot jingialang bad u IG BSF ban tei ia ka jingiadei kaba jan bad ki paidbah.
Ka jingkren jong u Conrad hangne ka paw shisha ba um don jingkit khlieh eiei ia ki Khasi, ynnai da ong than ia u Conrad ba u dei hi tang u puppet CM (Shillong Kid) ha ka jingshisha u Prestone keiñ kum u symbud myntri, u la dei ban shim khia khamtam ba ka dei ruh ha ka constituency jong u, pynban une thik la kum u Thlong u shu sngap man man khlem kren eiei, imat u lah shah tap Plaster ka shyntur ha u Boss Garo jong u ba um bit ban kren eiei. ka jingong jong u Conrad ba ka jingkulmar ka mih ka dei na ki nongkhaïi tuh, ka pyni ba u kwah ban shu pynkut jubor noh ia kañe ka kam khlem da kwah ne pynbunkam ban wad ia ki daw ka ba shisha baroh kiba la jia.